Agartala, Jymmang:
U Myntri ka tnat bording jong ka Tripura, u Ratan Lal Nath, u la weng noh ïa baroh ki shuti ba la buh na ka bynta ki nongtrei jong ka tnad bording jong ka jylla, ha ki bnai ba jur bha u slap, ha u Jymmang bad Jylliew, lait noh tang na ka bynta ki jingeh kiba jur bha ha ka liang ka koit ka khiah.
Ïa katei ka jingbthah la pynmih hadien ka jingïalang bishar bniah ba hakhliehduh ba la pynïaid da u Myntri ha ka sngi Balang ha kaba la don lang ki heh jong ka Tripura State Electricity Corporation Limited (TSECL), Tripura Power Transmission Ltd (TPTL), bad kiwei kiwei ki tnat treikam ba ïadei bad kane.
“Ka jingpynthikna ïa ka jingpynbiang bording khlem jingthut ïa ki nongshong shnong ha ka por tlang ka dei ka jingthmu ba kongsan tam jong ngi,” ong u Nath.
“Uwei pa uwei u dkhot jong ka tnad u dei ban kiew sha ka por bad pyndep ïa kane ka jingkitkhlieh kaba kongsan.”
Ki heh sorkar ki la ong ba u Myntri u la ai dak ruh ïa ki jingai jingkyrshan ne jingmyntoi ha kaba ïadei bad ki jingjia hadien ka jingjur slap na ka bynta ki nongtrei kum ka dak ban sngewnguh ïa ka jingaiti lut jong ki ha kane ka por ba eh.
Ka Tripura ka ju mad ïa ki jinglong jingman kiba jur bha ha ka por Lyiur kynthup ïa u slap uba jur, ki erïong, bad ki lyer kiba jur kiba ju pynjulor ïa ki jingtei bording kum ki laiñ pynpoi bording bad ki jaka pynpoi bording.
U Secretary ka tnad bor ding u Abhishek Singh u la ai ïa ka jingbishar bniah ïa ki jingeh jong ka tnad bad u la pynksan ïa ka rukom treikam kaba pynshong nongrim ha ka jingpynbeit ban pynduna ïa ki jingpynthut kiba lah ban mih.
U nongpynïaid jong ka TSECL u Biswajit Basu u la pynthikna ba ka korporashon ka long kaba la pynkhreh pura ban pynbiang ïa ki jingdawa jong ka aïom, da kaba kdew ba kam don ka jingduna ha ka bor briew, ki kali, ne ki tiar kiba donkam.
“Ngi la pynkhreh pura na ka bynta ka jingslap. Ka jingshakri kan ym shah ktah”, u la pynskhem.
U General Manager ka TPTL u Ranjan Debbarma u la bynrap ba ka jingmaramot ïa ki laiñ bor ding kiba heh bad ki Substation ka la jan dep. “La shim ïa ki lad jingïada ba kham bniah ha ki jaka ba rit paid kiba la ïohi ïa ka jingduh bording ha u snem ba la dep,” u la ong.
U la kdew ba watla katto katne ki jingpynlip bording ba la thmu ki lah ban long kiba donkam na ka bynta ban maramot, ki long kiba la thmu ban pynbha ïa ka jingshngaiñ jong ki paidbah ha ka por ba jrong bad ka jingshaniah ha ka jingshakri.
