London, Jymmang:
Katkum ki khubor, la ong ba ka Britain bad ka Germany ha kane ka por ki la mynjur ban iatreilang na ka bynta ban wanrah ia u ‘nam-ding uba khlaiñ bor bad uba lah ban kot haduh 2,000 Kilometre lane 1,242 mile ka jingjngai.
Kane ka jingiatreilang hapdeng kitei ki ri ka long hadien ka jing-iakren bad jingthmu ha u snem ba la leit ban wanrah ia ki tiar ïakhun ba thymmai bad kiba kham khlaiñ bor shuh-shuh ban ia kiba la dep don lypa.
Naduh ka por ba ki iasoi ia katei ka jing-iakut, u Trump ruh u la dep kren lypa ia ki ri ka dewbah Europe ba kin shim khia hi bad kin iatrei shitom hi da ka jing-iatrei lang para ma ki ban pyntikna ia ka shongsuk bad ka jingshngaiñ jong ki hi.
Kumta la ong ba u Myntri ka tnat ïada ri jong ka UK, u John Healey bad u Myntri ka tnat ïada ka Germany- u Boris Pistorius, kin sa pynbna ia kane ka jingiatreilang jongki naka bynta ban shna ba wanrah ia utei u ‘namding uba khlaiñ bor bad uba lah ban siat jngai.
U Healey u la ong ruh ba ha kane ka juk kaba ap da ki jingma kat sha ba phai, ka NATO bad ki ri Europe kin ieng iatylli lang kawei.
La ong ba kane ka jingiatrei lang jong kine ki arliang ri kan iarap ruh ban kyntiew ia ka jing-iadei jong ki bad kan long ruh ban pyntikna ia ka jingshngaiñ jong ki hadien-habud bad ha kajuh ruh ka por kan long ka jingplie lad ia ka jingwanrah ia ki kam ki jam ha baroh arliang ri.
