Shillong, Jymmang 19
Hadien ar bnai ka jingtrei shitom, baroh ka la urlong lyngba ka tie-breaker da 4-3 kol ha kaba ka India ka la rah ïa ka nam lahduh ha ka SAFF U-19 Championship pyrshah ïa ka Bangladesh. Lyngba kane jingjop ka dei ruh ka jingïaid lynti kaba thymmai jong kane ka kynhun ïalehkai Under-19 ka ri.
Na ka liang u coach ka India, Bibiano Fernandes u la ai jingïaroh ïa la ki khynnah hadien ba ki la shah pynkup burom kum ki nongjop ha ka SAFF U-19 ha Golden Jubilee Stadium ha ka Sngi U Blei.
“Ngi la tip lypa ba kan ym long ka jingïakhun phainal kaba suk,” la pynpaw u Fernandes ha ka jingïalang bad ki nongthoh khubor hadien ka jingïalehkai. “Ka Bangladesh ka la pyni ïa la ka jingtbit ha kaba ka la wanphai biang na ka jingshah thep kol. Hynrei ki khynnah jong ngi ki la pyni ïa ka jinglong kaba phylla ban ïai bteng ban ïakhun haduh 90 minit bad hadien.
“Ngi dei ruh ban sngewnguh kumno ka Bangladesh ka la ïakhun pyrshah. Nga tharai ba ki la pyni haduh katno ka long ka kynhun kaba khlaiñ. Ka la long ka jingïalehkai kaba pynhun ïa ki paidbah nongpeitkai, bad ha kaba kut, ngi sngewkmen ba ngi la mih kum ki nongjop,” la bynrap u Fernandes, uba la ïoh ban khur ïa ka nam lahduh kaba saw jong ka SAFF ha ka miet Sngi U Blei.
Katba ka jingïakhun phainal ka la nangjam shaduh ka jingïashut tie-breaker, u Fernandes u la shaniah beit ha ka kynhun da kaba jar jar ha ka jinglah jong ka India.
“Nga la ju long uba don ka jingkyrmen na ka bynta ki jingïashut tie-breaker namar nga don ka jingshaniah kaba pura ha ki nongïalehkai jong nga. Nga tip ba u nongapkol jong ngi u Suraj (Singh Aheibam) u tbit bha ban ïada ïa ki penalty.”
Katba ka kynhun ïalehkai U-19 ka ri ka dang ïai bteng ban ïakhun tyngeh, u coach jong ki uba la 48 snem ka rta u la pynshong nongrim shibun ïa ka jingmut jingpyrkhat ha ka jingkyrshan jong ki paidbah.
“Ka Arunachal Pradesh ka la long kaba phylla na ka bynta jong ngi. Ngam pat ju ïohi ïa kiba bun ki nongkyrshan ba kin wan sha ka jingïalehkai jong ki khynnah rit ha kano-kano ka jaka ha India. Ngin sa kynmaw thikna ïa kane ha ka jingim jong ngi baroh kawei,” u la bynrap. “Ka jingwan jong ki paidbah ka long kaba phylla, bad ki khynnah ki sngewtynnad ban ialehkai ha khmat jong ki.
“Nga kwah ban aiti ïa kane ka jingjop sha ki nongkyrshan ha Arunachal Pradesh, ki la long shisha kiba phylla. Ki la pynkhih ïa ngi bad kyrshan ïa ngi baroh shilynter. Ki la pynlong ïa ngi ban ïalehkai ha ka rukom kaba ngi la leh. Nga ngeit skhem ba kane kan pynshlur shuh shuh ïa ki samla ban angnud ban ïalehkai na ka bynta ka kynhun ïalehkai ka ri ha kawei ka sngi, bad ngin sa ïoh shuh shuh ïa ki nongïalehkai kum u Omang lyngba jong u.
Halor kane ka jingjop, ka India kan ïai bteng ban pynkhlaiñ biang ïa kane ka kynhun bad ban pynkhreh na ka bynta ka AFC U20 Asian Cup Qualifiers, ka ban long ha u snem ban wan.
Ki rangïalehkai ka ri ki la ïohpdiang ïa ki khusnam kiba kyrpang kiba kynthup ïa ka nam Highest Goal-scorer ba la ïoh da u Danny Meitei Laishram (uba la thep 5 kol), kumjuh ka Best Goalkeeper sha u Suraj Singh Aheibam, Most Valuable Player sha u Md Arbash bad Fair Play Award ka leit sha ka India.
