Shillong, Jymmang 19
U Sunil Deoghar uba dei u nongseng ïa ka ‘My Home India’ bad General Secretary barim ka Bharatiya Janata Party u la ïoh ban ai jingkren da ka Khasi bad rwai ruh da ka Khasi haba u long kum kongsan ha ka jingrakhe dap shisnem jong ka Seng Khasi Delhi Unit kaba la long ha ka 18 tarik Jymmang, 2025 ha nongbah Delhi.
Katkum ka jingbatai u Bah Marvel Sungoh uba dei Secretary ka Seng Khasi Delhi Unit, u la ïathuh ba la seng ïa kane ka unit ha ka 19 tarik u Jymmang, 2024 hynrei ïa ka jingdap shisnem la rakhe noh ha ka Sngi U Blei namar ka dei ka sngi ba baroh ki ïoh shuti.
U la ïathuh ba ka jingthaw ïa ka Seng Khasi Delhi Unit ka long ban tehsong ïa baroh ki para seng kiba don ha Delhi khnang ba kin ym long nongwei namar kiwei ki niam ki ju pynlong ka jingïakynduh lang ha ka Sngi U Blei.
U la pyntip ba ki dkhot jong ka Seng Khasi bad Seiñ Raij ki don palat 70 ngut hapoh ka jingïalam ka Kong Delina Khongdup kum ka President kaba dei ka dkhot jong ka National Commission for Women.
Ha kane ka prokram, u Sunil uba la sahteng mynshwa ha Shillong u la ai jingkren da ka ktien Khasi bad rwai ruh ka jingrwai Khasi.
