Shillong, Jymmang 19
Ka Federation of Khasi Jaiñtia and Garo People (FKJGP) South East Khasi Border Circle ka pynpaw ïa ka jingsngewdiaw halor ka jingshah beh kam noh ki paradoh parasnam haduh 30 ngut bad ha kaba ka kompeni ka la wanrah da ki bar jylla ha ka jaka jong ki.
Ka FKJGP hapoh ka jingïalam u General Secretary samla Entrust Snaitang hadien ka jingujor na ki paradoh parasnam ba dei ki nongbylla sngi hapoh jong ka JC Infra Company Ltd. kaba pyntrei ïa ka Prime Hub bad Farmer’s Market hapoh shnong Phlangwanbroi kaba don harum Mawsynram, ka la leit ban tuklar halor kane.
Kane kam dei shuh ka sien nyngkong ba ka seng ka leit ban jurip hynrei mynta la lai sien ka la leit ban jurip, ha kaba nyngkong la ïakren ba ka kam ba lah ban trei ki paradoh parasnam kim dei ban wanrah da kiba nabar jylla, ha kaba ki la kohnguh ïa kata hynrei mynta kynsan-kynsan la beh noh ïa ki paradoh parasnam kiba lah ban trei bad la wanrah pat da ki nongtrei bar jylla.
Kum ka seng ka phah ka kyrwoh kaba shai ba kin ym shah bad ailad ba kane ka kompeni kan wanrah nongbylla kiba nabar jylla namar kiba bun ki trai shnong ki lah ban trei bad ban tuh noh ruh ïa ka jingkamai jakpoh bad bylla sngi jong ki trai shnong kiba dei ki paradoh parasnam.
