Khliehriat, Jymmang 19
U Waheh Shnong jong ka Lumshnong, Ma Monlang Ladong, u la ong ba ka jingjia ha Star Cement ha ka miet jong ka 18 tarik Jymmang ka long kaba sngewsih namar uba khlad na kane ka jingjia u dei nongshong shnong ka Lumshnong.
Halor kane ka jingjia, u la ong ba na ka liang ka bor shnong kan buddien bad rai khot pynlong ïa ka jingïalang hapdeng ka Star Cement bad Pulit ban ïakren halor kane ka jingjia. U la ong ruh ba wat u nongñiah ka trok ruh kat haduh mynta u dang phet rieh bad ki pulit kim pat ïoh kem.
U la kyntu ruh ïa ki pulit ban shimkhia bad ban tohkit bniah halor kane ka jingjia khnang ban tem ïa kum kine ki jingjia hadien habud.
U nongñiah ka kali pick-up uba la khlad noh na kane ka jingshah ïuh kali u dei ba la tip kyrteng kum u Sniawbha Suchiang ba dang 19 snem ka rta, katba u nongñiah trok pat dei ba la tip kum u Sailangmi Dkhar, 39 snem ka rta na ka shnong Khliehtyrshi.U Management Representative ka Star Cement u Devander Bansal u la ong ba kine ki trok ba shah thang ki dei kiba pynïaid da ka NECPL kaba peit ïa ka kit ka bah mar ha kane ka kompeni. Baroh ki nongñiah ïa kine ki trok ki dei ki trai jylla.
Kane ka jingjia ka dei na ka jingkajia hapdeng u nongñiah pick-up uba shah ïuh bad u nongñiah trok ha surok bah NH-6 hajan ka shnong Wahïajer. Hadien ka jingjia kaba la pynlong ïa u nongñiah jong ka Pick-up lem bad kiwei pat ba kin beh thong ïa kane ka trok shaduh phyllaw jong ka Star Cement.
Dei hadien kane ka jingjia kala wanrah ïa ka jingklumar ha kaba u paidbhur u la tur bad thang ïa ka kali bad pynjot pynpra ïa ka ophis treikam jong ka Star Cement.
Utei u heh ka kompeni u la pyntip ba ha kane ka jingjia haduh 15 tylli ki trok jong ka Star Cement kila shah thang, bad 25 tylli kiba la shah pynjulor.
