Khliehriat, Jymmang 19
Ka Khasi Students’ Union (KSU) Lumshnong Unit ka la pynpaw ka jing-sngewkhia kaba jur halor ka jingsiat pynma ki security guard ka Star Cement ha ka 18 tarik Jymmang, kaba la wanrah ka jingkulmar kaba jur ha Lumshnong, East Jaiñtia Hills.
Kane ka jingjia ka la jia hadien ba u samla Sniawbha Suchiang, 19 snem ka rta na Lum-shnong, u la shah ïuh ha ka trok 16 shaka jong ka Star Cement kaba la ñiah da u Sailangmi Dkhar na Mookynniang, Khlieh-tyrshi, West Jaiñtia Hills District.
Ha ka kyrwoh ba la phah da u samla Mechak Kyndoh, General Secre-tary ka KSU Lumshnong Unit, u la ong ba u samla Sniawbha uba ñiah ïa ka kali pick-up u mut ban tam shakhmat ïa kane ka kali ka kompeni bunsien naduh shnong Wahïajer, Narpuh, hynrei une u nongñiah ka kompeni u khlem ai lad. Haba u Sniawbha uba ñiah ïa ka pick-up u la ïoh lad ban tam shakhmat, u la leit rung shapoh kompeni Star Cement da ka jingthmu ban ap ïa kane ka trok ha gate No.1 ban kren bad u nongñiah jong katei ka trok.
Haba u la kiew ha ka kali ban pyrshang ban ïakren, u nongñiah ka trok 16 shaka u la pynher ïa ka kali ha kaba une u la hap nalor ka trok bad u la khlad noh hashen. Kane ka paw shai ha ka CCTV kaba la sakhi da ki paidbah.
Une u nongïalam ka KSU u la ong ba dei hadien kane jingshah ïuh kali, ki paidbah jong ka shnong Lumshnong haba ïoh jingtip ki la mareh sha ka kompeni bad wad jingshisha bad thwet ïa une u nongñiah trok, ki security guard ne nongpahara ka kompeni ki la siat kuli, hynrei donbok ym don ba mynsaw.
Kane ka jingleh kine ki security ka kompeni da kaba siat kuli pynma ka la pynkhie bitar ïa u paidbah kaba la wanrah ïa ka jingkulmar thlim, la ong une u nongïalam KSU bad bynrap “Jin lada ki security katei ka kompeni ki khlem siat kuli, tharai katei ka jingklumar kam don hi.”
Ka KSU ka buh ka jingmaham ïa ki trok jong ka kompeni Star Cement namar ka jingleh baheh haba ñiah kali, ki pynher sted khlem kheiñ shuh ïano ïano. Ka kompeni ka dei ban pynduh kam ïa kum kitei ki nongñiah bym kheiñ snep ïa ki para briew.
Ka KSU ka la pynkynmaw ba dang ha kine ki khyndiat bnai ha ka por ba kitei ki nongñiah kali kompeni Star Cement ki dawa ïa ka hok na katei ka kompeni ban pynkiew bai kali ïa ki, ki samla jong ka shnong Lumshnong ruh da ka mynsiem sngewlem paradoh parasnam ki leit ban synranlang ha ryngkat ki dkhot ka VPP ban dawa ïa ka hok. Pynban pleng da kumne ki siew kylliang ïa ki mynsiem ba lui lui ki nongshong shnong.
Ka seng ka pynrem jur ruh ïa ka jingleh riew khlaw une u nongñiah trok ka kompeni uba la shim ïa ka jingim jong u samla bad ka dawa ba dei ban kem bad pynshitom katkum ka aiñ.
Ka KSU ka dawa ruh na ka kompeni Star Cement ba kan kit khlieh hi ïa kane namar ka kali dei hi jong ka. Ka longïing jong une u samla ba khlad ka dei kaba duk, dei tang une marwei uba ïarap ïa la u kpa bapli ban bsa ïa ka ïing. Ka jingkhlad jong u ka dei ka jingduhnong kaba khraw ïa ka ïing ka sem.
Ka KSU ka phah ruh ïa ka khubor sngewlem sha kiba haïing hasem bad baroh kiba don jingïadei bad u samla Sniawbha.
