Shillong, Jymmang 19
Ka Rifiness Warjri (20 snem ka rta) kaba dang pule ha St. Anthony’s College bad kaba dei ka Cadet jong ka 61 Meghalaya Girls Battalion NCC, ka la ban pyndep kiew ïa u lum Everest (8849 mtr), uba jrong ha ka pyrthei ha ka Sngi U Blei.
Kane ka samla ka Jylla kaba don hapoh ka kynhun jong ka NCC Mount Everest Expedition 2025, ka la long kawei napdeng 38 ngut ki nongkiew lum jong ka thaiñ shatei lammihngi ki ban pyndep ïa kane ka thong.
Kumba ka paw kane ka samla ka dei kaba lai napdeng ki kynthei jong kane ka Jylla, kata hadien ka Wansuk Myrthong, kaba dei ka pulit constable kaba la lah ban pyndep kiew ïa utei u lum ha u snem 2013 lem bad ka Dolyne Kharbhih (Senior GCI) jong ka Meghalaya Girls NCC Battalion, na RiBhoi district kaba la leit kiew ha u snem 2016.
Ha ka jingïaid lynti ka la lah ruh ban pyndep kiew ïa u lum Abi Gamin, uba jrong 7,355 meter ha Uttarakhand ha u bnai Nailar mynshem snem.
Ka Rifiness ka la pynlut ïa ki sngi ka jinglong khynnah ha Jylli Shop bad hadien ka la kynriah noh sha Kynton-u-Mon, Laitkor. Kane ka samla ka la ai burom sha la ki kmie ki kpa, u Bah Shlurbor Kharmyndai bad ka Kong Diamondsea Warjri kiba la ju kyrshan bad ai mynsiem ïa ka ha kane ka jingïaid lynti jong ka.
Na ka bynta ki briew jong ka thaiñ shatei lammihngi, ka jingjop jong ka Rifiness ki long kham palat ban ïa ki jingjop shimet; ki la shakri kum ka sharak jong ka jingkyrmen. Ha ka thaiñ ha kaba ka lad ka lynti ka ju shah khanglad ha ki jingeh jong ka, pynban ka jingjop jong ka, ka wanrah ka jingshai, ka pynshlur ïa kiwei pat ban beh ïa ki jingangnud jong ki, wat la ka long kaba jngai katno katno ruh ha ka jingïaid lynti ban kynjoh sha ka thong.
Ka jingsngewtynnat jong ka ïa ka kam kiew lum ka la sdang naduh ba ka la don bynta ha ka NCC ha ki por ba ka dang leit skul ha Auxilium Convent Shillong. Dei lyngba ka NCC ba ka jingsngewtynnat jong ka, ka la plie lang ha kane ka bynta, kaba la pynlong ïa ka ban ïashim bynta ha ki kam bapher bapher jong ka NCC.
Nalor ki jingangnud jong ka ban kiew lum, ka Rifiness ka dei ruh ka nongïalehkai Wushu bad Kick boxer, hadien ba ka la mihkhmat ïa ka Jylla ha ki jingïalehkai bapher bapher. Kine ki jingpynmlien jong ka ki la long ki jingïarap ban nang ïoh ïa ka met kaba khlaiñ ha ryngkat ka jingmut jingpyrkhat, kaba la ïalam ïa ka ban pyndep ïa ka jingkiew ïa u lum u ba jrong tam ha ka pyrthei.
