Nongstoiñ, Jymmang 19
Ka dewlynnong Nong-khnum ka dei kawei na ki dewlynnong kaba don ha ki bynta jong ka West Khasi Hills District bad kaba la khring ruh ïa kiba bun ki nongwan jngohkai pyrthei na kylleng ki jaka. Ïa kane ka dewlynnong la thaw bad pynlong da ka jingphiah (bifurcation) jong ka Wah Kynshi, bad kumba paw bad ïohi mynta, ka jingkhring jong katei ka jaka ka dei namar ka jingdon ka jingitynnad ha ka, kata nalor ka dewlynnong, ki shyiap (beach) bad hapoh ka bynta jong kane ka dewlynnong ki don ruh ïa ki kshaid.
Ki ar ngut ki shi kurim kiba dei na Bangalore ba kynthup ïa u Mahesh Ambaji Kadam haba ïakren halor ka dewlynnong Nongkhnum ha ka jingwan jngohkai ka jong ki, ki la pynpaw ïa jingsngewkmen kaba khraw hadien ba ki la wan jngoh bad sah kai ha ki lum pyngngad jong ka dewlynnong ha Nongkhnum ha kaba ki la ai ka jingïaroh halor ka jingitynnad katei ka dewlynnong bad ki kshaid ba kynthup ïa ka kshaid Weinia.
U Mahesh Ambaji Kadam u la ong ba ma u, ka kurim jong u bad ka khun ki kwah bha ban wan jngohkai sha ki jaka ka thaiñ shatei lam-mihngi khamtam ka Jylla Meghalaya ka dei kawei kaba ki da kwah eh ban wan.
Shuh shuh u la ïathuh ruh ba ki la don ha ka Jylla Meghalaya la kumba khatlai sngi eiei ha kaba ki la ïohlad ruh ban leit jngoh ïa ki katto katne tylli ki jaka jngohkai ba paw bad ka Nongkhnum ka dei ka jaka kaba khatduh ïa ki ha shwa ba kin leit phai noh sha la shnong.
Nangta, kine ki shi kurim ki la ai jingïaroh bha ïa ka jingitynnad jong ka sawdong sawkun jong ka dewlynnong bad khamtam ïa ka kshaid Weinia bad ki la ïaroh ruh khamtam ïa ki trai shnong kiba la ïalam ïa ki ban sakhi ïa ki jaka bad ki khsaid kiba itynnad kiba don ha katei ka dewlynnong bad ki la ong ruh ba ki trai shnong ki long kiba sngewtynnad bad pariah parai bha.
Ki la pynpaw ruh da kaba ong, “Ka dewlynnong Nongkhun ka don ïa ki jingitynnad ki jong ka khamtam ka jaka ka long kaba shngaiñ ïa kiba wan sah kai shi ïing shi sem nalor ka jingjai jai bad jingduna ka jingbun paid kum ha kiwei pat ki jaka jngohkai.” Ki la kyntu ruh ïa kiwei ki nongshangkai pyrthei ba ki dei ban wan jngoh ïa kane ka jaka.
Na ka liang kitei ki shi kurim kila ai jingmut ruh ïa ka Sorkar Jylla ba ka dei ban kham pynjanai shuh shuh ban pynitynnad ïa katei ka jaka khnang ba kan nang pynhun bad khring shuh shuh ïa ki nongjngohkai pyrthei na kylleng sawdong ka Ri bad ka pyrthei.
