Guwahati, Jymmang:
Kum ka jingpynkloi ïa ka jingpyntreikam hadien ba la ïoh jingtip na ka kynhun wadbniah, ki pulit jong ka Assam ha ka sngi U Blei ki la kurup ïa u drok Heroin uba bun bha uba khia haduh 395.67 gram, uba la antad ba u shongdor T.3.16 klur ha ka ïew be-aiñ, bad ki la kem ïa uwei u nongkhaïi drok hadien ba ki la ïoh kurup.
Ki tyllong khubor ki ïathuh ba ki pulit ki la bat ïa kawei ka kali kaba ïaid na Silchar sha Guwahati bad ki la ïoh ban kurup ïa u drok Heroin uba bun bha.
U Myntri Rangbah ka jylla Assam, u Himanta Biswa Sarma, ha ka jingpyllait khubor ha ka rynsan X, u la pynthikna ïa katei ka jingshah kem bad pynpaw ba, katkum ki jingtip barieh, ki pulit ka Guwahati, ki la bat ïa kawei ka kali, kaba dang ïaid na Silchar sha Guwahati bad ki la ïoh kurup 395.67 gram u drok Heroin, uba shongdor T.3.16 klur.
U Myntri Rangbah u la kdew ba hadien ka jingkem, ki pulit ki la kem ïa uwei na ki nongkhaïi drok.
U Myntri Rangbah u la bynrap ba ka Assam ka dang sahkut ha ka jingïakhun pyrshah ïa ki nongkhaïi drok.
