Guwahati, Jymmang:
U MP ka Congress uba dei ruh u nongïalam ha ka Lok Sabha, u Gaurav Gogoi, ha ka Sngi U Blei, u la kynthoh da kaba jur pyrshah ïa u Myntri Rangbah ka Assam, u Himanta Biswa Sarma, da kaba kyntait ïa ki jingkynnoh ba dang shen jong u, kum ki jingkynnoh “biej” bad “bym don jingmut” katba u buh jingkylli ïa ka jinglong jingman jong ka bor pyrkhat jong u Myntri Rangbah.
Haba leit sha ka rynsan phah khubor ha ka X, u Gogoi u la pyrshah jur ïa ka jingkynnoh jong u Sarma ba u nongïalam ka Congress u la leit jngoh ïa ka Pakistan da ka jingkhot jong ka tnat syntiat jong ka ISI bad u la ïatreilang bad ki nongsynshar jong ka Pakistan.
Da kaba khot ïa ka jingkynnoh ba khlem nongrim, u Gogoi u la thoh: “Namar ki daw kiba u tip bha, nga la don ha ka radar jong u naduh ba nga rung ha ka saiñ pyrthei Assam. U la kren bun ki jingkren khlem nongrim shaphang jong nga ha kine ki 13 snem ba la leit noh. Kawei kaba dang shen ka don ha pud jong ka jinglong bieit bad ka jingbym don jingmut.”
U la ong shuh shuh ba u Myntri Rangbah u leh kham palat kum u “troll na ka IT cell” ban ïa u khlieh sorkar, da kaba kren riewkhlaw khlem ka jingkyrshan kaba shisha. U Gogoi u la kdew ruh ïa ki mat shimet kiba lah ban ktah ïa ka jingbishar jong u Sarma.
“La ju ong ba haba don kaei kaei kaba pynkhuslai ha ïing, ka paw ha ka jinglong jingman jong ka jingmut jingpyrkhat jong u briew,” u la ong bad bynrap, “Ngin pynthikna ba hadien u snem 2026, un ïoh ban shongthait katto katne.”
