Tura, Jymmang 19
Ka Garo Students’ Union (GSU) ka la thoh sha u Myntri ka tnad Pule-Puthi, u Rakkam Sangma halor ka jingsngewkhia kaba jur jong ki samla pule namar ka jingduna ki lad jingpule ba shalor (kiba biang dor) na bynta ki samla pule kiba wan na ki longïing ba duna ka ïoh ka kot ha ka Jylla, khamtam ha ka thaiñ Ri-lum Garo.
Ha ka shithi sha u Rakkam, ka GSU ka la kyrpad ïa ka jingtuklar ba mardor jong u ban pynbun ïa ki ‘seat’ ha Tura Government College, kiwei-kiwei ki kolej Sorkar bad kolej shimet khnang ban weng ïa ka jingeh kaba ïadei bad ka jingduna ‘seat’ ha ki shlem pule kiba kham shalor.
Kane ka jingkyrpad jong ka GSU ka la wan hadien ka jingleh bha jong ki samla pule ka Ri-lum Garo ha ka risol ba dang shu pynbna jong ka eksamin SSLC. Da kaba buh jingmut lang ïa ki risol jong ka ‘Compartmental Exam’ ki ban sa pynbna shen, ka jingduna jong ki ‘seat’ na bynta kito kiba kwah ban pule kham shalor ka lah ban nang kham buh jingeh shuh-shuh.
“Ka Tura Government College ka dei ka jaka pule kaba kongsan na bynta ki samla pule na ki jaka nongkyndong bad ki ‘riewlum ki bym lah ban siew ïa ki bai klas kiba heh ba la shim da ki kolej shimet. Hynrei namar ka jingduna palat ki ‘seat’, da ki spah ngut ki samla pule kiba tbit ha ka jingpule ki shah kyntait ban rung klas man la u snem. Kane, ha kawei ka liang ka pynbor ïa ki ban iehnoh ïa ki jingangnud jong ki ha ka jingpule ne ban ïaid shakhmat ha ryngkat ka jingban khia ha ka liang ka pisa-tyngka ban rung klas ha ki shlem pule shimet – kaba long ka jingjied ka bym lah ban urlong na bynta ki longïing kiba la ïakhun lypa bad ka jingduk,” ong u President ka GSU, u Tengsak Momin.
U Momin u sngew ruh ba ki don ki jingeh kiba shyrkhei na ka jingduna ki ‘seat’ naba ka jingshah kyntait jong ki samla pule na ki longïing ba duna, ka wanrah ïa ki jingbteng ha ka jingduk ha kine ki longïing. Bun ki samla pule khamtam ki khynnah kynthei, u la pynsngew, ki hap ban sangeh noh shiteng por ïa ka jingpule jong ki namar ka jingbym ïoh lad katba ka thaiñ Ri-lum Garo, kaba la sahdien lypa, ka nang hiar shuh-shuh namar ka jingbym biang ki shlem pule.
Ka seng ka la pynsngew ïa ka jingdonkam ban pynbun ïa ki ‘seat’ ha baroh ki laiñ pule (Arts, Science, Commerce) ban pynrung kham bun ïa ki samla pule, ban pynkhlaiñ ïa ki jingtei ha ka pule-puthi (kynthup ïa ki kamra klas, ki ‘Laboratory’ bad ki nongtrei kiba paka) ban kyrshan ïa kane ka sienjam.
Shuh shuh ki la pynsngew ba ka jingwanrah ïa ka jingai jingïarap baibam katkum ka jingdonkam bad ka jingpyllait bai klas na bynta ki samla pule na ki longïing BPL kan ïarap ban weng ïa ka jingeh. Ka GSU ka la pynpaw ruh ïa ka jingkwah ban ïatreilang bad ka Sorkar ban pynithuh bad pyntreikam ïa ki lad jingpynbeit ban weng ïa kine ki jingeh.
“Kane ka mat ka ïahap bad ka jingkular jong ka Jylla halor ka ‘National Education Policy (NEP) 2020’, kaba ban jur ïa ka jingpule kaba kynthup lang bad kaba ïaryngkat. Da kaba pynbeit ïa ka jingeh halor ka jingduna ‘seat’, ngi lah ban pynkupbor ïa ki samla ba shah iehnoh beiñ, pynduna ïa ka jingwan buhai shnong na kawei ka Jylla sha kawei pat na bynta ka pule-puthi bad ban kyntiew ïa ka roi ka par ha ka imlang-sahlang bad ka ïoh ka kot ha Meghalaya,” la pynsngew u Tengsak lyngba ka shithi jong u, ha ryngkat ka jingkyrpad na bynta ka jingïalang halor kane ka mat.
