New Delhi, Jymmang 19 (UNI)
Kum shi bynta ban kyntiew bad ai mynsiem ïa ki shipai ka ri, u Chief of Defence Staff (CDS), General Anil Chauhan ha ka Lah Sngi U Blei u la leit ban jngoh ïa ki ktem shipai ba kongsan ba kynthup ïa ka Suratgarh Military Station bad ka Naliya Air Force Station.
U CDS u la ïakren bad ki shipai da kaba ban jur halor ka jingdonkam jong ka jinglong ba la khreh ha ka jingtreikam bad ka jinglah ban ïakhun ïa ki jingtynjuh kiba nang mih ha ka liang ka jingïada, ong ka kyrwoh na ka tnad ïada ri.
U la ai khublei halor ka jinglong ba la khreh ban treikam bad ka jingskhem jingmut jong ki shipai bad pynpaw ïa ka jingkyrmen skhem ha ka jinglah jong ki ban jubab ha ka rukom kaba paka lada jia ba wan ki jingma hadien-habud.
Kane ka jingleit jngoh ka long da ka mynsiem ba sngew sarong ban ithuh ïa ka jingshlur kaba long ka nuksa ba la pyni da ki shipai ha ka ‘Operation Sindoor’.
La pyntip ruh ïa u shaphang ki tiar ïada suiñ kiba thymmai bad ba khlaiñ kiba la pyndonkam ha katei ka jingthombor. U General Chauhan u la pynlong ruh ïa ki jingïalang bad ki heh shipai ha kane ka jingleit jngoh jong u.
U General Chauhan u la ai jingïaroh ïa ka jingshlur bad ka jingtbit jong ki shipai ha ka por ba ki dang ïaid shakhmat bad ka jingthombor.
Haba pynpaw ïa ka jingaiti lut jong ki, ka jingshlur bad ka jingkut jingmut kaba skhem ha ka ban pynduh pyndam ïa ki jingpyrshang ba bunsien jong u nongshun ka ri Sepngi ban pynkheiñ ïa ka jingïada, u la ong ba ki la bat ïa ki kyrdan nongrim ba ha khliehduh jong ka jinglong shipai.
U la ban jur ruh halor ka jingdonkam ban ïai long kiba la khreh na bynta ban jubab ïa kano-kano ka jingtynjuh da ka jingshim rai kaba tyngeh.
Ha ka jingkren jong u, u CDS u la ai jingïaroh ïa ka jingïatreilang hapdeng ki tnad shakri shipai bapher-bapher. U la ai khublei ruh ïa ki bor synshar jong ka thaiñ na bynta ka jingkyrshan jong ki, da kaba kdew ïa ka jingdonkam jong ka jingïatreilang hapdeng ki shipai – ki ‘riew paidbah ha kum kine ki jinglong-jingman ba kongsan.
Ïa u CDS la synran lang da u Lieutenant General, Manjinder Singh, Army Commander ka South Western Command bad u Air Marshal Nagesh Kapoor, Air Officer Commanding-in-Chief, South Western Air Command.
Kane ka jingleit jngoh ka la pynskhem biang ïa ka jingsngewnguh ka ri ïa ki shipai jong ka bad pynskhem ïa ka khubor jong ka jingïatylli, ka jinglong ba la khreh, bad ka jingkut jingmut ba khlem artatien na bynta ka ri.
