Shillong, Jymmang 19
U Myntri Rangbah ka Jylla, Conrad K. Sangma, ha ka Lah Sngi U Blei, u la leit jngoh ïa ka Shillong Government College of Engineering (SGCE), kaba la ïoh ïa ka jingmynjur na ka All India Council for Technical Education (AICTE) na bynta ban sdang noh ïa ki jingpule ‘Undergraduate’ ha ka laiñ ‘Civil Engineering’ bad ‘Electrical Enginee-ring’ na bynta ka samoi-pule 2025-26.
Ha ryngkat ka jingsynran lang ki heh ophisar ka tnad pule-puthi bad ka Shillong Polytechnic College, u Myntri Rangbah u la jurip ïa ka ïingmala jong ka Engineering College bad pynlong ïa ka jingïalang bad ki nonghikai jong ka kolej ban sngewthuh ïa ki jingdonkam jong ka kolej.
U la pyntikna ba yn sa pynbeit ïa baroh ki jingeh ban kyntiew ïa ki jingtei na bynta ban pyntreikam ïa ka Shillong Government College of Engineering kumba la bthah da ka AICTE.
Ki nonghikai jong ka Shillong Polytechnic College ki la pyntip ruh sha u Myntri Rangbah halor ka jingbei tyngka na bynta ki jingwad bniah ha ka liang ka Science & Technology, ïa kaba u Myntri Rangbah u la mynjur.
U la ong ruh ba ïa mynta, ka Chief Minister’s Research Fellowship (CMRF) ka bei pisa ïa ka jingwad bniah ba ïadei bad ka Arts & Culture, ha kaba yn sa pynheh shuh-shuh ban pdiang ïa ka kam wad bniah ha ka liang ka Science & Technology.
Ka Shillong Government College of Enginering ka dei ka kolej Sorkar ka banyngkong eh ha ka Jylla haba ïadei bad ka jingpule ‘Engineer’. Ïa ka Shithi Mynjur (Letter of Approval) la ai sha u Principal Secretary ka tnad Pule-Puthi ha ka 30 tarik Ïaïong. Kane ka shlem pule ka don ha Mawlai Kynton Massar, East Khasi Hills bad ka dei kaba la pynïasoh bad ka North Eastern Hill University (NEHU).
Ki ar tylli ki prokram pule ‘Undergraduate’ -‘Civil Engineering’ bad ‘Electrical Engineering’ kin sdang da ka jingpynrung khynnah kaba mar 30 ngut na bynta ka samoi-pule 2025-26.
