Imphal, Jymmang:
Ka Sorkar Manipur ka la mynjur ban pynjlan shisnem ïa ka jingshakri jong 10,500 ngut ki shipai ïada shnong (VDF), ban bteng ïa ka jingpynkhreh jong ki ha kylleng ka jylla haduh ka 31 tarik u Lber, 2026.
Katkum ka jingong u Joint Secretary ka tnad kam pohïing ka ri, u Mayengbam Veto Singh, kane ka rai ka pynpaw ïa ka bynta ba kongsan ba ki dkhot ka VDF ki don ha ka ban ïarap ïa ki pulit ka Manipur ban pynneh ïa ka jingshngaiñ jong ki paidbah bad ka suk ka saiñ.
Ka VDF, kaba la seng kum ka kynhun kyrshan ba ïarap, ka la kylla long ka bynta kaba kongsan ha ka jingïada ha ka kyrdan jong ka imlang-sahlang bad ka jingpyrshang ban ïaleh pyrshah ïa ki lehnoh, khamtam ha ki jaka ba kham buh jingma.
“Katkum ki kyndon jong ka jingïatreilang, ïa ki briew jong ka VDF la thung nyngkong na ka bynta shisnem, ryngkat bad ki kyndon ban pynjlan por katkum ka jingdonkam jong ka jingïada jong ka jylla. Ïa kane ka rai la shim hadien ka jingbishar bniah ïa ki jingdonkam ba mynta,” ong u Singh.
Ïa kane ka jingpynjlan por la mynjur paidbah ha ka jingïalang jong u Lat ka jylla kaba la long ha ka sngi Palei ha Raj Bhavan, ha kaba la pynïaid da u Lat ka jylla u Ajay Kumar Bhalla.
U Chief Secretary u Prashant Kumar Singh bad ki heh ophisar na ki tnad bapher bapher ruh ki la ïashim bynta ha kane ka jingïalang, kaba la pynleit jingmut halor ki jingpynkylla ha ka rukom synshar, ka jingpynroi ïa ki jingtei, bad ka jingpynbha ïa ki rukom ai jingshakri.
Ki briew jong ka VDF ki dang ïai bteng ban shakri kum ka bor kaba kongsan ha kaba ïada ïa ki shnong bad kyrshan ïa ki pulit ha kaba pynïaid ïa ka aiñ bad ka suk ka saiñ, khamtam ha ki jaka ba don ki jingïaleh.
Ka jingdon jong ki ka long kaba kongsan khamtam ha ki jaka ba marjan bad ki jaka ba shah ktah ha ki lehnoh, ha kaba ki ïarap ban ïada ïa ki riew paidbah bad ban pynthikna ïa ka jingshong suk shongsaiñ.
Kane ka jingpynjlan por ka wan hapdeng ka jingsngewkhia kaba nang kiew hapdeng ki dkhot ka VDF halor ka jingïoh kam bad ka jingsiew.
Ki heh sorkar ki la kdew ba ka sorkar ka dang tip ïa kine ki jingeh bad ka dang trei ban pynbha ïa ka jinglong jingman jong ki shipai VDF, haba kheiñ ïa ka jingnoh synñiang kaba donkam eh jong ki sha ka tnad pahara hapoh ka jylla.
