Shillong, Jymmang 19
Ka Meghalaya Football Association (MFA) ka pynpaw ïa ka jingsngew-lem halor ka jingkhlad noh jong u khlur ïalehkai phutbol ka Jylla, u Bah Fullmoon Pyrtuh (61 snem), uba la khlad noh ha ka Sngi U Blei ha ïingsah lajong ha Law-mali, Shillong.
Une u rangbah u la iehnoh shadien ïa la ka kurim Kong Monalisa Marbaniang lem bad ki khun.
U Bah Pyrtuh u la noh synñiang ha ka jingïaleh -kai phutbol ïa ka Jylla hi baroh kawei ha kaba u la sdang ha kane ka jingïaid lynti naduh u snem 1978 da kaba ïoh mihkhmat ïa ka Jylla ha ka Sub Junior National Tournament kaba la long ha Tinsukia. Ha ujuh u snem u la mihkhmat ïa ka St. Anthony’s Higher Secondary School ha kaba ka la rah ïa ka nam lahduh ha ka Subroto Cup 1978, kaba long ruh u mawjaw ha kane ka jingïaid lynti jong u ha ka kam ïalehkai phutbol.
Namar ka jingtbit jong u ban ïalehkai ha katei ka lympung, u la shah jied sa ha ka Indian School Team ban mihkhmat ïa ka ri ha ka 13th Asian School Football Tournament ha kaba u Bah Fullmoon u la shah ithuh kum u rangïalehkai sha-khmat ba tbit.
Ka khyllipmat ba sah jingkynmaw bha shaphang jong u ha ka kam ïalehkai phutbol ka dei ha kaba u la ïoh ban thep ïa ka kol ban pynjop ha ka jingïalehkai pyrshah ïa ka Singapore ha ka 13th Asian Football Tournament.
Kawei kaba pynsngewsih ïa u ka long ba u khlem shah jied ha ka kynhun ba nyngkong eh ban mihkhmat ïa ka Shillong ha ka Bordoloi Trophy ha u snem 1979.
U la ïoh ban ïalehkai ruh ha ka Blue Max FC, nangta bad ka Wahingdoh Sports Club, nalor ka kam ïalehkai phutbol u Bah Fullmoon u la long ruh u dkhot jong ka Shillong XI, ka Meghalaya State Senior Team bad ka Meghalaya Civil Service Team.
U la long ruh nongïalehkai ba pawnam bha ha ki por mynba u dang ïalehkai bad u la long u nongïalehkai ryngkat bad katto-katne ki khlur ïalehkai phutbol ha Meghalaya naduh ki snem ba la dep kum u Bah Augustine Kharkongor, Bah Tenzing Khyriem, L Darlong, Bah Michael Wahlang bad u Atom Dey.
Halor kane ka jingnoh synñiang, ka MFA ka pynpaw ka jingsngewsih halor ka jingduh noh ïa utei u khlur ïalehkai. “Ngi phah ka jingsngewlem sha ka ïing ka sem bad sha baroh kiba don ka jingïadei ba u. Ai ba ka mynsiem jong u kan shongthait ha ka jingsuk,” la pynpaw ka kyrwoh ba la pyllait da u President ka MFA u Bah Hamletson Dohling.
Ka jingleit ontep ïa u kan long ha ka Sngi Ba-ar ha u Lum Jingtep Balang Presbyterian Mawkhar ha Lawmali.
