Khliehriat, Jymmang 19
Ka jingjia ba itriem kaba la jia ha ka phyllaw jong ka kompeni Star Cement ha Lumshnong kaba la lam sha ka jingshah thang jong 15 tylli ki trok ha ka janmiet jong ka 18 tarik Jymmang ka la wan jia tang na ka daw ka jingjia ïa tyngkhuh kali kaba la lam sha ka jingïabeh thong.
U Additional Superin -tendent of Police ka District u pyntip ba ha katei ka janmiet Sngi U Blei ki pulit ki la ïoh jingtip halor ka jingjia shah ïuh kali kaba la jia hapoh ka phyllaw jong ka Star Cement, ha kaba uwei u trai shnong u la ïap hashen bad kaba la lam sha ka jingkhie bitar jong ki paidbah nongshong shnong.
Kumta mardor ki bor pulit na ka thanat Lumshnong ki la wan poi ha katei ka jaka ha kaba la phah shuh shuh ïa ki bor pulit. Ki bor pulit kiba la pynlong ïa ka jingtohkit bniah hadien ba ki la wan poi ha kane ka jaka ki la ïoh jingtip ba ha katei ka janmiet ka la don ka jingjia aksiden kali hapdeng ka trok jong ka Star Cement bad kawei ka kali Pickup ha ka surok bah NH-6 hajan ka shnong Wahïajer.
La ïathuh ba kane ka trok jong ka Star Cement ba la ñiah da u trai shnong ka la phet krad na kane ka jaka hadien ka jingjia kaba la pynlong ïa u nongñiah jong ka Pick-up lem bad kiwei pat ba kin beh thong ïa kane ka trok shaduh phyllaw jong ka Star Cement.
Hadien ba la wan poi ha kane ka jaka, u nongñiah ka Pick-up uba dei ruh u trai shnong u la kiew ha katei ka trok jong ka Star Cement bad ktah kti ïa u nongñiah, bad ha ka jingpyrshang ban phet krad bad ban ñiah shakhmat, kane ka trok ka la ïoh ïuh ïa une u nongñiah ka Pick-up uba la khlad noh hashen.
Tang hadien khyndiat por kumba 300 ngut ki briew kiba dei na ki shnong ba marjan kiba rah da ki tiar pynmynsaw kynthup ïa ki dieng ki maw ki la ïalum lang hapoh ka phyllaw jong ka Star Cement bad sdang ban pynjulor ïa ka jaka ap pahara, ki kor CCTV bad thombor ïa u nongap pahara.
Kine ki paidbah kiba don hapdeng ka jingbitar ki la khang lynti ruh ban pynkynriah ïa ka metïap jong utei u lanot, hadien la lah ban pynkynriah noh ïa u sha Civil Hospital, Khliehriat.
Kine ki paidbhur tang hadien katto katne por ki la thang noh ïa kumba 15 tylli ki trok kiba pynïeng bad ha kiwei pat ki bynta jong ka Star Cement. Hadien kane la phah mardor ïa ka kali pynlip ding, hynrei u paidbhur u la thombor ïa ki dkhot pynlip ding jong ka Star Cement bad pyrshang ruh ban pynjulor ïa ka kali pynlip ding.
Na ka liang ki bor pulit ki la pyrshang ban pynsangeh ïa u paidbhur uba thmu ban thang ïa kane ka kali pynlip ding bad thombor ïa ki nongap pahara, hynrei u paidbhur u la sdang ban ktah kti sa ïa ki pulit kiba pyrshang ban tehlakam ïa ka jinglong jingman bad ban ai jingïada ïa ki mynsiem briew bad ki jingdon jingem.
Hynrei da ka jingwan poi shuh shuh ki bor pulit la lah ban tehlakam ïa ka jinglong jingman bad ban pynpra ïa u paidbah kumjuh ban pynlip ïa ka ding kaba klang.
Hadien kane ka jingjia, la phah shuh shuh ïa ki bor pulit sha kane ka jaka khnang ban khanglad na ka jingïakynad kaba lah ban nangpur shuh shuh.
Halor kane ka jingjia na ka liang ki pulit ki la register case bad ka jingtohkit ka la ïaid shakhmat.
