New Delhi, Jymmang 20 (UNI)
Hapdeng ka jingnang kiew jong ka jingdon ki nongpang ha Singapore bad Hong Kong, ka jingdon jong ki nongpang kiba shah ktah ha ka jingpang COVID ba dang shitom ha India haduh ka 19 tarik Jymmang, 2025, ka long 257 ngut, ong u Director General of Health Services (DGHS) ha ka Sngi Ba-ar.
Kane ka long ka jingkheiñ kaba duna eh haba ïanujor bad ka jingbun briew jong ka ri.
La jan baroh na kine kiba shah ktah – ka jingpang ka dei kaba malu-mala, khlem da donkam ban leit sha hospital, la ong hadien ka jingïalang khmih bniah, katkum ka kyrwoh jong ka PIB.
Ki khubor ba dang shen ha ki lad pathai ki la pynpaw ïa ka jingkiew ha ka jingdon jong ki nongpang ba shah ktah ha ka COVID-19 ha Singapore bad Hong Kong ha kine ki khyndiat taïew ba la dep.
Katkum ki jingtip ba la ïoh hashuwa, ka jingpang ha kiba bun ka long kaba malu-mala, bad kam don jingïadei eiei bad ka jingshitom jur ne ka jingïap.
Haba khmih ïa kine kiei-kiei baroh, la khot ïa ka jingïalang khmih bniah jong ki ‘riew shemphang na ka National Centre for Disease Control (NCDC), Emergency Medical Relief (EMR) Division, Disaster Management Cell, Indian Council of Medical Research (ICMR) bad ki hospital Sorkar Pdeng hapoh ka jingpynïaid jong u DGHS.
Haba ïadei bad kane, la pynkut ïa ka jingïalang ba ka jinglong-jingman jong ka jingpang COVID-19 ha India mynta ka don hapdeng ka jingbit-jingbiang.
“Haduh ka 19 tarik u Jymmang, 2025, ka jingdon jong ki nongpang kiba dang shah ktah ha ka COVID-19 ha India ka long 257 ngut, ka jingkheiñ kaba dang duna eh haba nujor bad ka jingbun briew ha ka ri. La jan baroh na kine ki nongpang ba shah ktah, ka jingpang ka long kaba malu-mala, khlem da donkam ban leit sha hospital”, la ong ka kyrwoh.
“Ka rukom peitngor kaba khlaiñ na bynta ki jingpang ring bad pynhiar mynsiem ba kynthup ïa ka COVID-19 ka don ruh ha ka ri lyngba ka Integrated Disease Surveillance Programme (IDSP) bad ka ICMR”, la ong u DGHS, da kaba bynrap, ka tnad ka koit ka khiah ka Sorkar Pdeng ka dang long kaba peitngor bad kaba shimkhia ha ka ban buddien ïa ka jinglong-jingman, da kaba pyntikna ba ki lad jingïada paidbah ha ka liang ka koit ka khiah ki long kiba bit ba biang.
