Shillong, Jymmang 20
Ka Kong Atremedaki Phawa kaba dei ka trai jong ka dukan die jadoh ha Ïewduh ïa kaba la tip kyrteng kum ka “Bei Synshar Jadoh Stall” kaba u Myntri Rangbah ka Jylla, Conrad K Sangma ha ka Lah Sngi Blei u la leit ban bam jadoh ha ka por ba u leit jurip ïa ka Ïewduh, ka la ong ba na ka liang jong ka bad kiba ïatreilang ki la pynkhreh ïa ki jingbam hadien ba ki la ïoh khubor ba u Myntri Rangbah ka Jylla u mut ban wan jurip ïa ka Ïewduh.
Ka Kong Atremedaki ka la ong ba ki la don ka jingthmu ba u Myntri Rangbah un sa wan ban rung hapoh dukan die ja jong ki namarba ki shait pynkhreh ïa ki jingbam kiba bang, kumta ka la ong ba kita ki jingpynkhreh ki khlem shym long kiba sepei.
“Ngi don hi ka jingthmu ba un wan ban rung hapoh ka dukan jong ngi namarba ngi shait pynkhreh ïa ki jingbam kiba bang bad kata ka jingpynkhreh ka khlem long kaba sepei re namarba u la wan ban rung hapoh ka dukan jong ngi”, ong ka Kong Atremedaki.
Ka la ong ba ka long kaba sngewtynnad shikatdei eh ba u Myntri Rangbah ka Jylla un wan ban rung bamja hapoh dukan jong ki namarba la 45 tylli ki snem ba ki la shong dukan hapoh Ïewduh bad kane ka dei ka sien banyngkong ba kum u Myntri Rangbah ka Jylla un wan rung bam ja ha ka dukan jong ki.
“Ka long kaba sngewtynnad ba u wan rung hapoh ka dukan jong ngi namar la 45 snem ngi la shong dukan bad kane ka dei ka sien kaba nyngkong ba u Myntri Rangbah un wan ban bamja hapoh dukan jong ngi,” ong ka Kong Atremedaki.
Ka la ïathuh ruh ba u Myntri Rangbah ha ryngkat bad kiba wan synranlang ïa u ha katei ka sngi, ki la bam mar ar pliang ka jadoh kynthup ïa u Symbud Myntri Rangbah ka Jylla Bah Prestone Tynsong lem bad kiwei-kiwei.
Ka la ïathuh ruh ba kitei ki heh Sorkar ki la bam da ka jadoh ha ryngkat ka dohkhleh, dohjem, dohsyiar Khasi bad kiwei-kiwei ki jingtah.
“Hadien ba ki la dep ban bam, ki la ïakren bad ong ba ka bang bha ka bam. Shisien hi ba ki la bam arsien, ka bang hi ka bam bad jan baroh ki ïabam mar arpliang ka ja”, ong ka Kong Atremedaki.
Ka la ong ba ka kyrmen skhem ba ka Sorkar kan peit bad khmih bha ïa ka Ïewduh ha kaba ïadei bad ka khuid-ka suba bad ka kyrmen ruh ba kumba ka Sorkar ka la mut bad mang ïa ka pisa ban pynbha ïa ka Ïewduh kan urlong shisha.
“Ka jingangnud jong nga ka long ba kin peit bad khmih bha ïa ka ïewduh ba kan long kaba khuid-ba suba, kaba itynnad bad kaba iphuh-iphieng kumba ki la mut bad mang ba kan long kumta hi. Ngin sa ïapeit pat ïa kaba shakhmat ba kan long kumno la ka long ne kam long kumta hynrei maki ruh kila wan ban pynbha ïa ka ïew bad ban wanrah ïa kita ki skhim,” bynrap ka Kong Atremedaki.
