Shillong, Jymmang 20
U Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing u la ong ba ki khyrdop lum khajna kiba pynïeng da ki Autonomous District (ADC) bad ki bym ïaid katkum ka aiñ kin shah pynpra bad shah khang beit ha ka Sorkar Jylla.
Haba kren sha ki lad pathai khubor ha ka Sngi Ba-ar, u Bah Prestone u la ong, ki khyrdop lum khajna ne ki khyrdop talasi ki dei ban ïaid bad ban kyrshan da ka aiñ bad lada kim dei kiba kyrshan da ka aiñ ne kiba la shu pynïeng beaiñ, kam don lynti da kumwei bad ïa kum kine yn hap ban pynpra bad khang noh shi syndon.
“Kino kino ki khyrdop khrong khajna ne ki khyrdop talasi ki dei ban shna katkum ki kyndon aiñ lym kumta hap ban pynpra bad khang syndon ïa ki,” la ong u Bah Prestone.
Ha shuwa kane, na ka liang jong ka Khasi Hills Autonomous District Council (KHADC) ka la kynnoh ba ka jingkhang dam ïa ka khyrdop lum khajna jong ka Council ha Umdihar, Ri-Bhoi District, ka dei kaba la leh donbor da ki bor pynïaid district ka Ri-Bhoi, halor ka nongrim ba pynïeng ïa kane ka khyrdop khlem da ïoh jingbit.
Lah ban pynkynmaw ba ki bor pynïaid District ka Ri-Bhoi ha ka Sngi Thohdieng mynshem taïew, ki la khang khyrdep ïa ka khyrdop lum khajna jong ka Khasi Hills Autonomous District Council (KHADC), kaba dang shu pynïeng dang shen ha surok NH-06 ha Umdihar.
Ka bor District ka la shim ïa kane ka lynti halor ka nongrim ba ïa kane ka khyrdop la pynïeng beaiñ ha surok NH-06 bad ka la khrong pisa haduh T.200 na kawei ka trok kit mar kiba ïaid lyngba ka khyrdop. Nangta la ong ruh ba ka jingpynïeng ïa ki khyrdop ha ka suroh National Highway ka dei kaba hap ban da ïoh jingbit na ka Ministry of Road Transport & Highway (MoRTH) ka Sorkar Pdeng.
