Shillong, Jymmang 20
Ki nongshong die jingdie ha Ïewduh ha ka 20 tarik Jymmang, 2025 ki la pynpaw ïa ka jingsngewkmen bad ka jingkyrmen hadien ba u Myntri Rangbah ka Jylla, Conrad K Sangma, Symbud Myntri Rangbah ka Jylla, Bah Prestone Tynsong bad u Myntri ka tnat Jngoh kai Pyrthei ka Jylla, Bah Paul Lyngdoh, ki la wan ban jurip ïa ka ïewduh ha ka 19 tarik Jymmang 2025, ban peit bad khmih ïa ki jingduna bad ka jingbit-jingbiang jong ki nongshong ïew bad ki paidbah nongwan ïew bad ban sngap ruh ïa ka jingpynsngew ki nongshong ïew halor ki jingeh jong ki.
Ha kaba ïadei bad ka jingkren u Myntri Rangbah ka Jylla ba ka Sorkar kan sa mang biang ha ka bynta kaba lai ban shna sa ïa ki jingda kum ki tnum bad ban tei pynbha bad pynitynnad ïa ka ïew baroh kawei khnang ba ki paidbah nongshong ïew bad ki paidbah nongwan ïew kin lait na ka jingjhieh ha ka por slap, na ka liang ki nongshong ïew ki la pynpaw ka jingsngewkmen shikatdei eh halor kane.
Ki nongshong ïew ki la pynpaw ruh ïa ka jingsngewkmen kaba khraw halor ka jingwan jurip dalade jong u Myntri Rangbah ka Jylla uba la wan ban peit bad khmih ïa ki jingduna hapoh ka ïew namarba kane kan long ka jingmyntoi kaba khraw ym tang ïa ki nongshong ïew hynrei wat ïa ki paidbah kiba wan ban thied jingthied ruh kumjuh.
“Ngi sngewnguh ba ki wan peit ïa ka ïew bad kaba kongsan ba ma ngi kum ki nongshong madan ngi jynjar namarba ngi hap ban tap da ka plastik ha ka por slap bad ka ju hap ka um na ki plastik halor ki briew kiba ju ïaid lynti. Haba ki la wan ban peit kumto te ki la ong hi ba kin shna bad ban ai T.15 klur ban pynbha ïa ka ïew, kaba kongsan ka long ba kin shna noh ïa kane najrong khnang ba ngin lait na u slap bad ba ym donkam shuh ban ker plastik bad ba ki nongwan ïew ruh kin nym hap um shuh haba ki ïaid lynti”, ong ki nongshong ïew.
“Katta nga la shong ïew la 18 snem, ngam pat ju ïohi ba uta u Myntri Rangbah ba un wan sha ïew, ka dei ka sien banyngkong mynnin ba nga ïohi”, ong kawei na ki nongshong ïew.
Ki nongshong ïew ki la pynpaw ba ka jingeh jong ki ka dei ha ka por slap namar ki um na nala ki ju tuid bha bad kane ka wanrah jingeh shikatdei eh ïa ki nongshong ïew bad kumjuh ruh ïa ki nongwan ïew.
