Shillong, Jymmang 20
U Bah Ricky Shullai uba dei u MDC ka Laban-Mawprem u la kyrpad na u Myntri Rangbah ka Jylla Conrad K Sangma ba un tuklar lem da kaba ïakren bad ka Ministry of Defence lem bad ka Ministry of Home Affairs ban pynphai noh ïa ka madan Krikit sha ka shnong Laban.
Ha kaba ïadei bad kane ka mat, u Bah Ricky ha ka step Sngi Ba-ar u la leit ban ïakynduh markhmat ïa u Myntri Rangbah hapoh ka ïingsah ka jong u ban buh ïa kane ka jingkyrpad lyngba ka dorkhas kaba u la aiti.
Haba kren sha ki lad pathai khubor, u Bah Ricky u la ong ba ka madan Krikit (Garrison Ground) ha Laban ka dei kaba la ai jingshakri bha ïa ki nongshong shnong ka Laban bad ka sor Shillong khamtam lei ïa ka Laban Sport Club. U la pynpaw ba ka jingpynphai biang ïa kane ka madan kan long ka jingïarap kaba khraw ban kyntiew ïa ki kam ïalehkai hapoh ka thaiñ Laban.
Katkum ka jingong jong u, kane ka jingmut ka la wan ha u hadien ka jingïohi ïa kaei kaba ha Mizoram ha u bnai Lber mynta u snem haba ki shipai Assam Rifles ki la pynphai noh ïa ka jaka ba heh haduh 106 acre sha ka Sorkar.
U Bah Ricky u la ong ba ka madan Krikit ka dei kaba don shibun ki khana bad ka dei ruh ka jaka ba pynbam smai ïa u Myntri Rangbah ba nyngkong ka Assam u Gopinath Bordoloi ha u snem 1947 bad kumjuh ruh ïa u Myntri Rangbah ba nyngkong eh ka Jylla Meghalaya ha u snem 1972.
Haba kylli, une u MDC u la pyntip ba na ka liang u Conrad u la kular ba un sa shimkhia ban ïakren bad ka Sorkar Pdeng haba pynpaw ruh ïa ka jingsngewtynnad ba don kum kane ka jingpynsngew.
