Khliehriat, Jymmang 20
Ki pulit ka District East Jaiñtia Hills ki la kem noh ïa u nongñiah trok jong ka karkhana Star Cement hadien ba u la wan pyndep ha thanat Ummulong ha West Jaiñtia Hills ha ka 20 tarik Jymmang.
Une u nongñiah trok u la shah kynnoh ba u la ïuh ïa uwei nongñiah jong ka kali Pick-up uba la khlad noh hashen bad kaba la pynmih ïa ka jingjia thombor paidbah kaba triem hapoh ka phyllaw jong kane ka kompeni ha Lumshnong, East Jaiñtia Hills ha ka janmiet jong ka 18 tarik Jymmang.
Ka khubor pulit ka ong ba la register case kam bymman pyrshah ïa une u nongñiah trok ka Star Cement ïa uba la tip kyrteng kum Sailangmi Dkhar uba dei na ka shnong Khliehtyrshi West Jaiñtia Hills hapoh thanat Lumshnong bad ka jingtohkit ka la ïaid shakhmat.
Lah ban kdew ba ka jingïap jong utei u samla uba ñiah Pick-up uba kyrteng u Sniawbha Suchiang 19 snem rta uba dei na Lumshnong ka la wan jia hadien ba ha katei ka juh ka janmiet ka la jia ka jingïatyngkhuh hapdeng kane ka trok jong ka Star Cement bad katei ka Pickup ha ka surok bah NH-6 hajan ka shnong Wahïajer.
Ki pulit ki ïathuh ba kane ka trok ka Star Cement ka la phet krad na kane ka jaka hadien ka jingjia kaba la pynlong ïa u nongñiah jong ka Pick-up lem bad kiwei pat ba kin beh thong ïa kane ka trok shaduh phyllaw jong ka Star Cement.
Hadien ba la wan poi ha kane ka jaka u nongñiah ka Pick-up u la kiew ha katei ka trok jong ka Star Cement bad ktah kti ïa u nongñiah, bad ha ka jingpyrshang ban phet krad bad ban ñiah shakhmat, kane ka trok ka la ïoh ïuh ïa une u nongñiah ka Pick-up uba la khlad noh hashen.
Tang hadien khyndiat por kumba 300 ngut ki briew kiba dei na ki shnong ba marjan kiba rah da ki tiar pynmynsaw kynthup ïa ki dieng ki maw ki la ïalum lang hapoh ka phyllaw jong ka Star Cement bad sdang ban pynjulor ïa ka jaka ap pahara, ki kor CCCTV bad thombor ïa u nongap pahara.
Kine ki paidbah kiba don hapdeng ka jingbitar ki la khang lynti ruh ban pynkynriah ïa ka metïap jong utei u lanot hadien ba la lah ban pynkynriah noh ia u shapoh Civil Hospital, Khliehriat.
Kine ki paidbhur tang hadien katto katne por ki la thang noh ïa kumba 15 tylli ki trok kiba pynïeng bad ha kiwei pat ki bynta jong ka Star Cement. Hadien kane la phah mardor ïa ka kali pynlip ding, hynrei u paidbhur u la thombor ïa ki dkhot pynlip ding jong ka Star Cement bad pyrshang ruh ban pynjulor ïa ka kali pynlip ding.
Na ka liang ki bor pulit ki la pyrshang ban pynsangeh ïa u paidbhur uba thmu ban thang ïa kane ka kali pynlip ding bad thombor ïa ki nongap pahara, hynrei u paidbhur u la sdang ban ktah-kti sa ïa ki bor pulit kiba pyrshang ban tehlakam ïa ka jinglong-jingman bad ban ai jingïada ïa ki mynsiem briew bad ki jingdon-jingem.
Hynrei da ka jingwan poi shuh shuh ki bor pulit la lah ban tehlakam ïa ka jinglong-jingman bad ban pynpra ïa u paidbah kumjuh ban pynlip ïa ka ding kaba klang.
