Nongstoiñ, Jymmang 20
Ka Dong Nongrim kaba dei ka Block-6 jong ka Upper New Nongstoiñ ha ka 19 tarik mynta u bnai ka la pynkut noh ïa ka lympung ïalehkai Futsal ba la tip kum ka Nongrim League Futsal Tournament 2025 ha kaba ka Ailad Re Football Club ha ka liang ki kynthei bad ka ‘Wut Wut FC’ ha ka liang ki shynrang ki la long kum lahduh.
Kane ka nam jop jong ka Wut Wut FC ka la wan hadien ba ka la pynliem noh da 2-0 kol ïa ka Ïaipyrshang FC, katba ka Ailad Re FC ha ka liang ki kynthei ka la jop ïa ka Ailad Shuwa FC da 1-0 kol ha ka jingïakhun final.
Ïa kane ka lympung kaba don haduh 13 tylli ki kynhun, la wan ban pynhap pyrda noh da u Bah Hamar Lyngkhoi uwei na ki samla rangbah jong katei ka dong kum u kongsan ha ryngkat ka jingïadonlang u Sordar ka shnong, ki ‘riew rangbah bad kiwei kiwei.
Na ka liang jong ki kongsan ha ryngkat ki ‘riew rangbah ka shnong ki la ïoh ruh ban sam ïa ki khusnam sha ki jingjop bad ki khusnam shimet ba kynthup ïa ka Youngest Player sha u Mewaphylla Syiemlieh, Oldest Player sha u Bah Badamut Hoojon, Best Goalkeeper sha u Willbert Dkhar bad ar ngut ki Top Scorer, kita u Pynskhemboklang Mawlieh bad u Rishot Lyngdoh Lawryniang bad ka Brother YC ka la ïoh nam Discipline team.
