Shillong, Jymmang 20
U Superintendent of Police ka East Jaiñtia Hills u la pyntip ba ka la don kawei ka metïap jong uwei u briew uba ym pat ithuh satia kaba la ïoh ban tam na kawei ka jaka kaba long sañium.
Halor kane ka jingjia, la ïathuh ba ha ka 18 tarik u Jymmang, 2025 ha ka por kumba 7:00 baje mynstep, uwei u nongshong kali uba wan na Mizoram da ka Tata Sumo, u la hiar ha kawei ka jaka kaba long sañium ban leit shabar ha thaiñ Kuliang. Ha kata ka por, u la shem ïa kawei ka metïap ba la sop ha ka nep kaba la sdang pyut ha ryngkat ka sma iwtung kaba la pynlong ïa u ban pyntip mardor sha ki pulit ha Umkiang Police Patrol Post (PPP), kiba don ha ka jaka ban tehlakam ïa ka leit ka wan ha surokbah.
U Sub-Inspector P Phawa bad kiwei ki pulit ryngkat bad u ki la leit mardor sha ka jaka ba lap ïa ka metïap, kaba don kumba 8 km na Kuliang PPP ha surokbah NH-06. Ka jingtohkit kaba la leh ha ka jaka ba jia, kam shym la lap ïa ki dak ba don jingmynsaw ha ka met jong u briew, namar ba ka met ka la sdang pyut bha.
Ka jingkheiñ kaba la ïoh ka pyni ba u briew uba la khlad u don hapdeng 35-40 snem ka rta, u dei uba lieh ka sniehdoh, bad u don ka jingjrong kumba 5 phut 5 inch. U phong da ka patlun rong ïong, ka sopti rong jyrngam bad u don ïa u tyllai rong lieh uba teh ha kti, kaba lah ban pyni ïa ka jingïadei bad ka niam Hindu.
Hadien ba la pyndep ïa ki jingdonkam kiba dei, la pynkit noh ïa ka met sha Civil Hospital, Khliehriat ban leh post-mortem. Hadien kata, la buh ïa ka met ha ka jaka buh metïap ban ap ïa ki bahaïing kiba lah ban ithuh ïa ka met.
Kumta, na ka liang ki bor pulit ki la kyrpad ïa kiba don jingtip ne kiba lah ban ithuh ïa une u briew, la kyntu ban phone noh mardor ha une u number: 8131904491 bad ban leh ïa kaba donkam.
