London, Jymmang:
Ka United Nations ha kane ka kynti, ka la maham ba palat 14,000 tam ki khyllung ki lah ban iap ei hapoh ka nongbah Gaza tang hapoh jong ki 48 kynta lada ka Israel kam ailad ban pynpoi ia ki lad jingïarap sha ki paid nongshong shnong jong ka Gaza Strip.
Namar la ong ba ki bor pyniaid ka Israel ki la ailad tang ia ki katto- katne ki lad jingïarap kiba dei ban poi sha ki paidbah hadien 11 bnai jong ka jingkhang syndon khop ia baroh ki khyrdop bad ki jaka rung sha nongbah Gaza ban ym ailad ia ki tnat ïarap ba kin leit rung shapoh ka nongbah.
Kane ka jingmaham jong ka United Nations ka long hadien ka jingpyrshah jong ki para marjan ri kiba kynthup ia ka US, Canada, France bad ka United Kingdom.
U heh ka tnat phah jingïarap jong ka UN, u Tom Fletcher, u la ong ba ki don tang 5 tylli ki trok kiba kit ia ki jingdonkam jong ki paidbah, kynthup ia ka jingbam jong ki khyllung, kiba la ioh ban rung shapoh ka nongbah Gaza ha ka Sngi Nyngkong.
Namar la ong ba ki nongialam jong ka Britain, France bad Canada ha ka Sngi Nyngkong ki la pynrem jur halor ka jingbym kheiñ snep jong ka Israel ia ki paidbah nongshong shnong ka Gaza bad ba kam shym la ailad ia baroh ki lad jingïarap jong ki riew paidbah ba ki dei hok ban ioh.
Haba kylli kumno ka UN ka la trei ba ki 14,000 ngut ki khyllung ki don ha ka jingma ban ïap thngan ha Gaza, u Fletcher u la ong ba ki kynhun jong ka United Nations ki dang trei ha ki jaka kum ki jaka sumar bad ki skul ban bishar bniah ïa ka jingdonkam. “Ngi don ki kynhun kiba khlain ha madan – bad hooid bun na ki ki la shah pyniap… ngi he dang don bun ki briew ha madan – ki don ha ki jaka sumar, ki don ha ki skul…ki pyrshang ban bishar bniah ia ki jingdonkam,” u la ong.
Hapdeng ka jingpynbor jong ki ri ka pyrthei halor ka jingkyrduh bam ha Gaza, u Myntri Rangbahduh jong ka Israel, u Benjamin Netanyahu, u la shah pynbor ban pynjem ïa ka jingkhang ai jingïarap kaba la pynjot kaba la neh 11 taiew, ha ka miet Sngi U Blei. U la ong ba ka long kaba donkam ia ka Israel ban khanglad ia ka “jingeh jong ka jingkyrduh bam” ha Gaza namar ki “daw ba iadei bad ka kam saiñpyrthei” – hynrei tang ha ka kyrdan kaba rit tam.
