Tura, Jymmang 20
Ha ka kyrwoh shithi kaba tyngeh sha u Vice-Chancellor ka North Eastern Hill University (NEHU), ka Tura Campus Staff Welfare Association (TCSWA) ka la pynpaw ïa ka jingsngewkhia kaba jur halor kaei kaba ka ñiew kum ka “jingshah leh shiliang kaba ïai bteng” bad ka “jingshah leh meinah” kaba mad ha ka Campus, bad kaba la treikam naduh u Rymphang 1996.
Kane ka shithi, kaba la mih hadien ka khubor ba la pynmih ha kawei ka kotkhubor phareng ha ka 1 tarik Jymmang, ka la khring ïa ka jingbym shimkhia ha ka liang ka rukom pynïaid bad ki kam tei jingtei kaba ka Tura Campus ka la mad ha kine ki 30 snem.
Kaba kham paw ka long ba ka seng ka la pynpaw ïa ka jingbym don pura jong ki ‘Sanctioned Post’ na bynta ki nongtrei bym dei ki nonghikai (kiba donkam) kum ki ‘Clerk’, ‘Section Officer’, ki nongñiah kali, ‘Peon’, bad ki nongap pahara.
“Kane ka jingbym shimkhia kaba la neh la slem ka kdew shai ïa ka jingphai khmat ka bym ïahap sha ka jaka pule jong ngi da ka Headquarters,” la ong ka seng.
Nalor kane, ka dei ka jingbym shah kynthup jong ka Tura Campus ha ka jingleit jngoh ba dang shen jong ka kynhun ka University Grants Commission (UGC) kaba khmih bniah ïa ki jingtyrwa kam pynroi ha ka Shillong Headquarters. Kane ka jingshah kyntait, ka seng ka kynthoh, ka la pynduh noh ïa ka Tura Campus ïa ka lad ban wanrah ïa ka jingpynpaw na bynta ka jingbei pisa kaba kongsan bad ki jingdonkam ha ki jingtei.
Haba ñiew ïa kane kum ka “jingbym suitñiew na ka Headquarter,” ka seng ka la maham ba ka jingbym shimkhia kaba ïai bteng ka pynthut ïa ka jingnang kiew jong ka Tura Campus bad khanglad ïa ka jinglah jong ka ban shakri ïa ki jingangnud ha ka pule-puthi jong ka thaiñ.
Ha ka shithi jong ka, ka seng ka la buh katto-katne ki jingdawa ba kongsan – ‘Equitable Rationalization of Non-Teaching Vacancies’ hapdeng ka Shillong bad Tura; ‘Devolution of Administrative and Financial Powers’ ban shah ïa ka Tura Campus ba kan synshar laitluid ïalade; ban pynkhlaiñ ïa ka ‘Engineering Cell’ khnang ban pynsted ïa ki kam pynroi ha ka liang ki jingtei; jingshna ïa ki ‘Academic Building’ na bynta ki tnad treikam bad ka jingbhah pisa kaba wan beit na ka UGC.
Ka seng ka la kdew ba kine ki sienjam ki long kiba donkam na bynta ka Tura Campus ban treikam bha kumjuh ban pyndep ïa ka kamram ha ka ban pynbiang ïa ka jingpule ba kham shalor kaba paka sha ki paidbah Ri-lum Garo bad ki jaka ba marjan.
Ïa kane ka shithi la phah kopi ruh sha u Myntri Rangbah ka Jylla, Myntri ka tnad Pule-Puthi ka Sorkar Pdeng, Chairman ka UGC, sha u Pro-Vice Chancellor ka NEHU Tura Campus, bad sha katto-katne ki kynhun seng ha Ri-lum Garo.
