Aizawl, Jymmang:
Ka Mizoram ka la sakhi ïa ka jingkiew kaba phylla ha ka kam jngoh kai pyrthei ha ka snem mang tyngka 2024-25, ha kaba ka jingwan jngoh kai pyrthei ka la kiew da palat 114% haba ïanujor bad u snem ba la dep, katkum ki jingtip ba la pynmih da ka tnad jngoh kai pyrthei jong ka jylla.
Haduh u bnai Rymphang 2025, ka jylla ka la ïoh ïa ka jingwan jong ki nongjngoh kai pyrthei haduh 4,69,753 ngut, kaba kiew bha na ka 2,19,114 ngut ki nongwan jngoh kai pyrthei ha u snem 2023-24. Ki heh sorkar ki la kdew ba ïa ki jingkheiñ ba khatduh na ka bynta u bnai Lber ym pat lah ban lum, bad ka jingkheiñ ka lah ban kiew shuh shuh.
Na ki nongwan jngoh kai mynta u snem mang tyngka, 4,64,742 ngut ki dei ki nongwan jngoh kai pyrthei napoh ri, katba 5,011 ngut ki dei ki nongwan jngoh kai pyrthei kiba wan na palat 80 tylli ki ri, kynthup ka America, United Kingdom, Germany, China, bad Japan.
Uwei u heh jong ka tnad jngoh kai pyrthei u la ong ba katba kiba bun ki nongwan jngoh kai ki wan na ka bynta ki jingthmu kiba ïadei bad ka kam khaïi, bun ruh ki leit na ka bynta ban wad bniah, ban leit jngoh ïa ka longïing, bad ban lehkai. Ka kam jngoh kai pyrthei ka la nang kiew stet ha Mizoram naduh ka jinghiar dor jong ka khlam.
Ka jingdon jong ki nongwan jngoh kai ka la hiar sha ka tang 20,564 ha u snem 2020-21, hynrei suki suki ka la kiew sha ka 1.32 lak ha u snem 2021-22, bad 2.22 lak ha u snem 2022-23.Kata ka jingkiew mynta ka la nang stet bha.
Ka Aizawl distrik ka la paw kum ka jaka jngoh kai kaba hakhmat eh ha ka por jong u snem 2024-25, ha kaba ka la khring ïa 2,62,224 ngut ki nongjngoh kai pyrthei napoh ri bad 4,097 ngut ki nongjngoh kai pyrthei. La bud sa ka distrik Kolasib, kaba don ha khappud bad ka Assam, kaba la pdiang ïa 1,05,593 ngut ki nongwan jngohkai, ba kynthup ïa 25 ngut nabar ri.
Ki heh sorkar ki la pynshong nongrim ïa ka jingkiew jong kane ka tnat ha kawei ka bynta ha ka Policy jong ka Jngoh kai pyrthei kaba don ka jingkitkhlieh, kaba la wanrah ha u bnai Nailar 2020. Ka polisi ka kyntiew ïa ka kam jngohkai pyrthei kaba neh lyngba ka jingïatreilang bad ki paidbah, ka jingpynduna ïa ka jingduk, ka jingpynroi ïa ki sap, bad ki rukom treikam kiba don ka jingkitkhlieh ïa ka mariang.
