Shillong, Jymmang 20
Ka Hynñiewtrep Youths’ Council (HYC) Sengkmie ka la leit ban aiti da ka dorkhas ha u Executive Member ba dei khmih ïa ka tnat Khaïi-Pateng ka Khasi Hills Autonomous District Council (KHADC) halor ka jingdawa ban leh eiei katkum ki kyndon jong ka aiñ Khasi Hills District (Trading by Non-Tribals) Regulation, 1954.
Ha ka dorkhas ba la soi da u President ka HYC Sengkmie, u Bah Roy Kupar Synrem u la ong, ka seng ka kwah ban pyntip sha ka Council halor ka jingdon jong kawei ka Kompani/Kontraktor/Supplier kaba kyrteng ka M/s ASTOR INC na New Delhi, ba la ai ïa ka kontrak da ka NEIGRIHMS, Shillong na ka bynta ban ai ïa ki katto-katne ki jingshakri ha NEIGRIHMS katkum ka Bid Document jong ka 03 tarik Naitung, 2024.
Ka HYC ka la ïoh jingtip ruh ba ka NEIGRIHMS ka la ai ïa ka kam kontrak sha katei ka Kompani/Supplier da kaba kyntait sharud ïa ki Kontraktor/Supplier kiba dei na kane thaiñ bad kiba don ïa ka jingtreikam ba la pynshisha bad ki jinglah ban leh bad ban ai ïa kijuh ki jingshakri ha NEIGRIHMS.
U Bah Roy Kupar u la ong ba kane ka jingleh jong ka NEIGRIHMS ka long ka jingpyrshang ban kyntait ïa u kontraktor uba dei u trai ri-trai muluk bad uba dei hok ban ïoh ïa ki lad kamai-kajih bad ha kajuh ka por ka pynthut ïa ka ïoh-ka kot bad ka pynduna ïa ki lad kamai-kajih na ka bynta ki trai ri-trai muluk.
“Kane ka jingleh jong ka NEIGRIHMS ka long ka jingpyrshang kaba shai ban kyntait ïa u kontraktor/nongsam mar jong ngi uba dei hok bad uba lah ban ïoh ïa ki lad kamai bad kumjuh ruh ka pynthut ïa ka jingroi ka ïoh ka kot ha ka thaiñ kaba ha kajuh ka por ka pynduna ïa ki lad kamai na ka bynta ki nongtrei trai ri trai muluk”, ong u Bah Roy Kupar.
U la ong ba ki kam khaïi jong kane ka kompeni ki don hapoh ka jingpeit jong ka KHADC bad kumta ka donkam ïa ka Trading License na ka Council katkum ki kyndon jong ka Khasi Hills District (Trading by Non-Tribals) Regulation, 1954. Kumta na ka liang ka seng ka dawa ba ym dei ban ai Trading License sha kino-kino ki kynhun ba nabar kiba pyntreikam bad khamtam eh ïa ka M/s ASTOR INC na New Delhi da kaba pyntreikam pura ïa ki kyndon jong ka Khasi Hills District (Trading by Non-Tribals) Regulation, 1954 jong ka Section 3A jong katei ka aiñ.
