New Jersey, Jymmang:
Kawei ka longkmie na New Jersey, la ong ba ka la shah pynngat kyndon halor ka jingiap jong u khun uba dang rit ha ka por ba ka ñiah ia ka kali khlem da don ia ka ‘license’ kaba treikam bad kane ka la jia ha ka shnong Jackson Township ha ka Sngi Saitjaiñ, ha kaba katei ka longkmie ka la kum tynrah ia la u khun – u Wendy Castillo-Torres uba dang 10 bnai.
Ki pulit ki la ioh jingtip shaphang katei ka jingjia ha ka por kumba 6:15 jong ka janmiet Sngi Saitjaiñ hadien ba utei u khyllung u la dep shah rat ha katei ka kali kaba katei ka longkmie ka ñiah.
Hynrei, la ong ba ha ka por ba ki pulit ki leit poi sha katei ka jaka, ki shem ba utei u khyllung um shym tip briew shuh bad la pynbna iap noh ia u da ka Monmouth Medical Centre jong ka Lakewood tang mar ia pynpoi ia u ha katei hi ka jaka sumar.
Ki pulit ki ioh shem ruh ba ka Castillo-Torres kam shym don ia ka ‘Driving License’ kaba dang treikam ha katei ka por ba kane ka jingjia ka la jia.
