Shillong, Jymmang 20
Ki rangïalehkai barim ka Jylla ki la pynpaw ka jingsngewsih halor ka jingkhlad noh u khlur ïalehkai phutbol ba paw ka Jylla u Bah Fullmoon Pyrtuh ha ka rta kaba 61 snem.
Haba ïakren bad ki nongthoh khubor ha shwa ban pyndep ïa ka met kaba sah jong utei u rangbah ha ka Sngi Ba-ar, u Bah Tensing Khyriem uwei na ki khlur apkol ba kynsai uba la ïadon bynta lang bad ka St Anthony’s Higher Secondary School kaba la rah ïa ka nam lahduh ha ka U-17 boy’s Subroto Cup kaba la long ha Delhi ha u snem 1978, u la pynpaw ba ka jingkhlad noh u Bah Fullmoon ka la long ka jingduh kaba khraw ym tang ïa u shimet hynrei ïa ka Jylla hi baroh kawei.
U Bah Tensing uba la ïalehkai lang ha kito ki por bad u Bah Fullmoon na ka Blue Max, u la pynpaw ruh ba ha kito ki por u dei u rangïalehkai ba tbit bha kat haduh ba u la shah jied ban mihkhmat ïa ka ri India ha ka 13th Asian School Football Tournament ha u snem 1979 kaba la long ha Sri Lanka bad u la ïoh ruh ban thep kol na ka bynta ban pynjop ïa ka India pyrshah ïa ka Singapore. Kumjuh, u Bah Tensing u la don bynta bad utei u rangbah ban mihkhmat lang la bun sien ha ka Santosh Trophy.
Kiwei pat ki rangïalehkai kiba la pynpaw ki kynthup ïa u Bah Richard Nongneng uba la ïalehkai lang na ka Blue Max, nalor u Bah Mekostar Marbaniang ba ïalehkai na ka Wahingdoh Sports Club bad kiwei kiwei.
Ha kane ka sngi kiba bun na ki rangïalehkai barim kiba la ïalehkai lang ha kito ki por kiba la leit, ki la wan poi ha ka ïingsah jong utei u rangbah ha Lawmali Shillong ban ïa sngewlem ryngkat bad ka ïing ka sem kiba la mad ha kum kane ka jingjia ba sngewsih. Kine ki kynthup ïa u Bah Rishes, Bah Lastborn Shangpliang, Bah Modon Shang-pliang, Bah Ailad Kharngap Kynta, Bah Cliff Nongrum, Bah Seibor Sana bad kiwei kiwei.
Ha kane ka sngi la tep donburom ïa utei u rangbah ha u lum jingtip ka Balang Presbyterian Mawkhar kaba ha Lawmali, Shillong.
Ha shwa ban rah ïa ka met kaba sah sha u lum jingtep, la pynïaid ïa ka jingleh niam da ka Balang Presbyterian Mawkhar, la ïoh ruh ki jingkren lyngkot na ka Kur Pyrtuh, na ka ïing bad ka Sport Club kaba na Moodymmai.
