Shillong, Jymmang 20
Ka shlem treikam jong ka Sports Authority of India (SAI) Training Centre, Shillong kan pynrung ïa ki khynnah kiba don sap ha ka jingïalehkai Archery, Athletic, Boxing, Football, Judo bad Karate ki ban hap hapoh ka residential bad non-residential scheme.
Na ka bynta ka Archery (Girls Residential & Non Residential Scheme), Athletic (Residential Boys & Girls), Boxing (Residential Scheme Boys) bad Karate (Residential Scheme Boys & Girls) yn pynlong ha ka 30 bad 31 tarik mynta u bnai, katba ïa ka Football (Non Residential Boys) yn pynlong ha ka 2 bad 3 tarik u Jylliew bad ka Judo (Residential Scheme Boys & Girls) kan long ha ka 9 bad 10 tarik u Jylliew. Kat kum ka kyrwoh ba la pyllait da katei ka shlem ai jinghikai la ong ba baroh kitei ki prokram kin sdang naduh ka por 8 baje mynstep ha SAI Training Centre kaba don ha NEHU.
Kane ka jingjied kan long katkum ka jinglah ha ki jingïalehkai ryngkat bad ka jingjied halor ki jingjop ha ki kyrdan bapher bapher jong ka lympung ïalehkai kiba la ïoh jingithuh kum ki Inter National, National, State & District. Lyngba ka battery test katkum ka rta jong ki bad kiwei kiwei ki jingdonkam.
La bthah ïa ki khynnah ba ki dei ban wanrah ryngkat bad ki dur ba dang shu dep shon, ka Aaddhar card ryngkat bad ki syrnod sngi kha ba la ïoh na Municipality/CHC/Primary Health Centre.
