Shillong, Jymmang 20
U Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing (Police) u la kren shai ba kan ym don satia kano-kano ka jingtohkit halor ka jingkynnoh ba dang shen da ka Hynñiewtrep National Liberation Council (HNLC) ba u Bah Sniawbhalang Dhar uba dei u Symbud Myntri Rangbah ka Jylla u la bei tyngka ïa katei ka seng ha ka por ba u dang long Myntri ha ka Sorkar ba ïalam da ka Congress.
Haba kren sha ki lad pathai khubor ha ka Sngi Ba-ar, u Bah Prestone u la ong ba ka Sorkar kam sngew donkam ban pynlong ïa kano-kano ka jingtohkit.
“Nga ïeng halor ki jingkren jong u Bah Sniawbhalang. U la dep ban kren shai ba um don jingïadei lane ba ju siew pisa sha ka HNLC. Ngin leh aïu shuh? Nga ïeng ha ki jingkren jong u,” la ong u Bah Prestone.
“Lada ki don ki briew ki bym kmen ïa kata, ki long kiba laitluid ban wad shuh-shuh ïa ki jingtip bad ïa kaei-kaei kaba ki kwah hynrei na ka liang ka Sorkar hi, ka jingkren jong u Bah Sniawbhalang ka dei kaba ngi la pdiang,” la ong u Bah Prestone.
Ha kaba ïadei pat bad ki jingdawa ba dei ban don ka jingtohkit, u Bah Prestone u la ong “Ka jingtohkit aïu? Em, peit shane lada ngi hap ban wanrah ïa ka jingtohkit halor ki jingkynnoh, ngi don da ki hajar ki jingkynnoh. Hato phi mut ban ong ba ngi donkam ban tohkit ne thaw ki kynhun tohkit ruh ïa ki hajar tylli ki jingkynnoh?
