Jowai, Jymmang 21
U Myntri Rangbah ka Jylla, Conrad K Sangma ha ka 21 tarik Jymmang u la aiti ïa ka bhah ba nyngkong kaba T.1 klur hapoh ka Meghalaya Healthcare Advancement Policy (MHAP) sha ka Dr. Norman Tunnel Hospital, Jowai.
Baroh ka jingïarap ba la ai sha kane ka hospital ka long T.2 klur.
Ïa ka bhah kaba sah sa T.1 klur yn pyllait ynda la dep ban pyndonkam ïa ka T.1 klur kaba la aiti nyngkong na ka bynta ban pyndonkam ha kane ka hospital.
Hapoh jong kane ka skhim la ai T.10 klur ïa ki 5 tylli ki hospital kiba la pynïaid da ki kynhun jong ka jylla.
Haba kren ha ka jingïalang u Myntri Rangbah ka Jylla u la pynpaw ba ka Sorkar ka don ka jingïatreilang ka ban neh slem bad ki hospital mishon.
“Kane kam dei ka jingleh kaba tang shisien hynrei ka dei ka jingsdang jong ka jingïatreilang kaba la slem. Ka skhim ka long kaba ïar, ki hospital ki lah ban shim hi ïa ka rai ïa kaei kaba donkam kyrkieh tam bad pyndonkam ïa ka pisa.”
Ïa kane ka jingïalang la pynïaid da u Rev. S Lamare, uba la pynpaw ïa ka jingsngewnguh ïa ka jingkyrshan bad ban bteng ban ai jingïarap na ka bynta ka jingtei ïa ka jaka pule nursing.
Ka Dr. D Nongpluh, Medical Superintendent ka la ban jur ïa ka jingdonkam kyrkieh ban don ïa ka Renal Dialysis Unit khamtam ba don ka jingkiew jong ki jingpang bym ïa bit (non-communicable diseases).
U Myntri Rangbah u la pynbna ruh ïa ka jingthmu ban pynlong ïa ka State Level Healthcare Conference ban tei ïa ka jingïatreilang hapdeng ka Sorkar, ki jaka sumar kiba pynïaid da ki mishoneri bad baroh kiba don bynta lang ha ka koit ka khiah.
“Ngi dei ban ïa ïaid shakhmat da ka jingïatreilang, ban ïasam jingmut, ban weng ïa ki jingeh bad ban ai ka jingshakri kaba kham bha,” u la ong.
U la pyntip ruh, ba ka Sorkar kala pyndonkam ïa ki kor teknoloji bad buddien bniah ïa ka rukom pun khun kaba don hapdeng ka jingma kynthup ïa ka jingpynbeit ïa ki jingeh ha ka por kaba biang.
