Washington, Jymmang:
U Secretary of State jong ka US, u Marco Rubio, ha ka Sngi Ba-ar u la ong ba ka US ka la dep pynduh noh ia ki visa jong ki hajar ngut bad ba kan nang pynjur shuh shuh ia kane ha kine ki sngi ban wan.
Namar ka sorkar jong u Trump naduh ba u Trump u la wanphai biang sha ka bor ha une u snem, ka la ialeh ban pynher krad lut ia baroh ki phetwir bad ki bar ri kiba leit shong- leit sah be-aiñ ha US bad ki bym biang kot- biang sla bad kumta ruh ka la sdang ban pynduna ia ka jingsam Visa sha ki khynnah pule ba nabar kum shi bynta ban tehlakam ia ka jingbun ki nongbuhai shnong sha US.
Haba kylli shaphang ka jingdon ki khynnah pule ba nabar ka US kiba la shah pynduh Visa ha kane ka por, u Rubio u la ong ba ki don palat hajar ngut ki khynnah pule ba nabar kiba ka US kam shym ai Visa shuh namar ka jingbym biang jong ki jingdonkam bad kane kan sa nang jur ruh lada peit thuh bad shim jingkheiñ thymmai nadien jong u bnai Lber shaneng.
Hynrei hapoh jong u bnai Lber, u Rubio u la iathuh ba ka US ka la ioh ban pynduh Visa tang ia kumba 300 tylli bad kitei kiba la shah pynduh Visa ruh ki kynthup lang ia ki khynnah pule bad ki nongleit- nongwan lane ki nongjngoh kai pyrthei.
Namar u la ong ba ka ‘Visa’ kam dei ka hok, hynrei ka dei tang ka rai bad ka kabu ia kito kiba kwah ban wan rung sha US naka bynta ki kam jongki.
