Jowai, Jymmang 21
Ka Jaiñtia Students Union (JSU) ka la dawa ïa ka jingsdang noh jong ka klas step ne Morning Shift ha Govt. Boys Higher Secondary School Jowai bad ka klas janmiet ne ka Evening Shift ha Kiang Nangbah Govt. College, Jowai khnang ban lah ban pdiang klas khambun ngut ki khynnah pule.
Ka seng ka la pynmih ïa kane ka jingdawa ha ka dorkhas ba la ai sha u Myntri Rangbah ka Jylla u Conrad K Sangma ha Orchid Inn Thadlaskeiñ ha ka janmiet jong ka 21 tarik u bnai Jymmang.
Ha katei ka dorkhas, ka seng ka la ong ba katkum ka jingshem jong ka, ka Kiang Nangbah Govt. College ka lah ban shim ne pdiang klas tang 350 ngut ki khynnah pule kynthup mynstep bad mynsngi bad ka Govt. Boys Higher Secondary School pat ka pdiang tang 115 ngut ki khynnah pule ha ka por mynsngi ne day shift.
Ka JSU ka la dawa ruh ba ka Sorkar ka dei ban pynheh noh ïa ki building jong ka Kiang Nangbah Govt. College bad ka Govt. Boys Higher Secondary School khnang ba kin lah ban pdiang kham bun ngut ki khynnah pule.
Halor kitei ki jingdawa jong ka JSU, u Myntri Rangbah u la kular ban khmih bniah ïa ki bad kumjuh ruh ban thaw ki lad ki lynti kumno ban pynurlong ïa ki.
