Gaza, Jymmang:
Ka Israel ka la pynjur ia ka jinghiar thma ha Gaza ha kine ki sngi ba la dep ha kaba ym duna 38 ngut ki nong Palestine ki la iap ha ki jinghiar thma liengsuin jong ka Israel ha kylleng ka Gaza Strip ha ka por shiteng kynta shi miet, ong ka khubor jong ki doktor jong ka Palestine.
Ki liengsuiñ thma jong ka Israel, ki la ther ïa ki katto katne ki jaka, kynthup ïa kawei ka skul ha ka bynta ba shatei jong ka nongbah Gaza, bad ka jaka theh umphniang ba la iehnoh, kaba pynsah ïa ki longïing kiba la shah pynkynriah jaka ha ka ktem phetwir jong ka Nuseirat, ha pdeng jong ka Gaza, ong ka khubor jong ka tnat ïada ri paidbah, kaba la pynïaid da ka Hamas.
Ka la bynrap ruh ba ki kynhun pynlait im ki ïakynduh jingeh kaba khraw ban poi sha kiba mynsaw namar ka jingduna ki tiar bad ka jingjur jong ka jingshah bom.
Kane ka jingshah thombor ka long hadien ba ka Israel ka la pynmih ïa ka hukum ban pynkynriah ïa ki riew paidbah ha Gaza kum ka jingpynkhreh ïa kaei kaba ka la ong ba ka dei ka “jingthombor kaba khlem pat ju jia mynno mynno ruh”.
Ka jingpynbna ba im shiphew ngut ki briew ki la ïap, haba ka jinghiar thma liengsuiñ jong ka Israel, ka la ther ïa ki kamra klas jong ka Musa bin Nusayr School, ha kaba da ki spah ngut ki briew kiba la shah pynkynriah, ki la rieh tngen, ong ka khubor jong ki nongïakhih na ka thaiñ ha Gaza City.
Hapdeng jong ka Gaza, la iathuh ba 15ngut ki briew, ki la iap ha ka jing thombor ia ki ïingjaiñ ha kawei ka jaka theh umphniang ba la iehnoh ha Nuseirat.
Ha kajuh ka por, ki nongthoh khubor na kane ka thaiñ ki la ïathuh ba 13 ngut ki nong Palestine ki la ïap ha ka jinghiar thma liengsuiñ ïa ka ïing kaba lai mala jong ka longïing Abu Samra kaba don ha pdeng jong ka Deir al-Balah.
Ha kaba kyrpang, ki liengsuiñ jet jong ka Israel ki la siat 10 tylli ki jinghiar thma na suiñ ïa ka dong Shujaiya kaba don ha ka thaiñ mihngi jong ka nongbah Gaza.
Ki khubor na ka thain ki la batai ba ki jingbthei ki la pynmih ia ki jingkhih kiba kum ka jingkhynñiuh jumai. Kitei ki jingshah thombor, la ngeit ba ki dei kiba la thmu ia ka network jong ka Hamas, kaba don ki thliew kiba don hapoh khyndew.
Kane ka jinghiar thma ka long ha ka por ba ki nongïalam jong ka UK, France bad Canada ki la pynmih ïa ka jingpynbna lang kaba byrngem ban leh eiei lada u Myntri Rangbah duh jong ka Israel u Benjamin Netanyahu u ïai bteng bad ka thong jong u ban “shim bor” ïa ka Gaza baroh kawei.
