Jowai, Jymmang 21
U Myntri Rangbah ka Jylla, Conrad K Sangma ha ka 21 tarik Jymmang u la plie ïa ka surok Hubert Rosario ha Spein Mookaswan, West Jaiñtia Hills District kaba jrong 1.13 km ba la shna ha ka jinglut kaba T.1.93 klur, kaba dei ka surok ban poi sha ka jaka ai jingsumar kaba la tip kum ka Hubert Acupressure Centre.
U Conrad haba kren ha ka jingïalang u la ong ba ka dor ba shisha jong kano-kano ka kam pynroi kam shong eh ha ka jinglut hynrei kan ïarap ïa ki nongïoh myntoi.
“Kane ka surok ka lah ban long ka projek kaba T.1.93 klur ha ka liang ka mang tyngka, hynrei ha nga, ka long kaba kordor haduh katta katta namar kane ka surok ka ktah ïa ka jingim jong ki briew, khamtam ïa kito kiba don ha ka jingjynjar, kiba wan shah sumar, bad ki Sister kiba aiti lut ban sumar ïa ki nongpang.
Haba pynpaw ïa ki jingthmu pynroi jong ka Sorkar, u la pyntip ba la bei tyngka ha ka liang ki jingtei, ha kaba tang 659 klur tyngka ki projek surok la pynlut hapdeng u snem 1991 bad 2018, bad palat 4,000 klur la pynlut tang ha ki hynriew snem ba la dep bad kumba 70% ki surok la shna pyndep hapoh ka Pradhan Mantri Gram Sadak Yojana (PMGSY).
Ka Meghalaya ka dei kawei na ki jylla kaba kiew ha ka jingbei tyngka ha ka liang ka koit ka khiah, da kaba pynlut palat 8% na ka mang tyngka jong ka jylla manla u snem kaba kot T.1000 klur. “Ka Sorkar ka kyrshan ym tang ïa ki hospital ba la pynïaid da ka Sorkar hynrei ka ïatreilang ruh bad ki hospital ba don ha ka jylla.
Ha kane ka sngi la donlang ruh u Symbud Myntri Rangbah ka Jylla Ma Sniawbhalang Dhar, katto-katne ki ‘riew rangbah ba kynthup ïa u Archbishop Victor Lyngdoh jong ka Shillong Diocese, u Bishop Ferdinand Dkhar jong ka Jylla Niam Jowai, u MLA Jowai u Wailadmiki Shylla, ki ophisar na ka tnat Public Works, bad ki dkhot jong ka bor synshar shnong.
