Nongpoh, Jymmang 21
U Deputy Commissioner jong ka Ri Bhoi District u Abhilash Baranwal ha ka Sngi Balang u la pynshai ba ka jingkhang ïa ka khyrdop kam dei satia ba ki bor pynïaid District kim kheiñ burom ïa ka Khasi Hills Autonomous District Council (KHADC), hynrei ka dei halor ka jingïaid lait ïa ki kyndon jong ka aiñ bad ruh wat ha ka ‘Work Order’ kaba ka KHADC ka la pynmih ruh ka la kdew shai ba ym dei satia ban pynïeng khyrdop ha ka surokbah.
Kane ka jingpynshai jong u DC ka Ri-Bhoi ka la long hadien ka jingmih jingkynthoh na ki dkhot ka Executive Committee ka Khasi Hills Autonomous District Council (KHADC) halor ka jingkhang tala ïa ka khyrdop khrong khajna ka Council kaba don ha Umdihar.
U Abhilash Baranwal u la ong ruh ba na ka liang jong ki bor pynïaid District hi, ki don ïa ka jingburom kaba kyrpang ïa ka KHADC bad kumba ka jylla hi ka dei kaba hap hapoh ka khyrnit ba hynriew jong ka riti synshar treikam ka ri bad kyntait war ïa ka jingkynnoh ba um burom ïa ka KHADC.
Shuh shuh haba pynshai halor katei ka jingkhang dang ha kine ki khyndiat sngi ïa katei ka khyrdop khrong khajna jong ka KHADC kaba la pynïeng ha Umdihar, u Abhilash Baranwal u la ong, ka jingbuh ïa katei ka khyrdop ka la ïaid lait lypa ïa ka hukum kaba la pynmih da ka Sorkar Jylla ha u snem 2021 kaba la khang pyrshah ïa ka jingbuh ïa ki khyrdop khrong khajna ha ki surokbah National Highway bad State Highway.
U Abhilash Baranwal u la ong ruh ba nalor katei ka jingïaid lait ïa ki kyndon ka Sorkar Jylla, ka KHADC ha ka bynta kaba hynriew jong ka shithi aiti ban pyntreikam ïa katei ka khyrdop lane ka ‘Work Order’ ka la kren shai hi ruh dalade ba ka jingbuh ïa kino-kino ki khyrdop ban talasi (check point) lane ophis, kim dei satia ban ïeng ha ka surok bah National Highway bad State Highway.
Shuh shuh, utei u heh ophisar ka Ri Bhoi u la ïathuh ruh ba ki bor pynïaid district kim shym la khang satia ïa kiwei pat ki khyrdop jong ka KHADC bad jong u Syiem ka Hima Mylliem kiba la dep ban buh la kumba phra-shiphew tylli ha kine ki ar bnai tam ba la dep.
