Shillong, Jymmang 21
Ka East Khasi Hills District ka dang long ka kynhun ka ban lamkhmat ha ka sngi kaba ar jong ka State Level Inter School Athletic Meet 2025 bad ka la thikna ban rah ïa ka nam lahduh ha kane ka lympung.
Kane ka kynhun ka la khur haduh 14 tylli ki takma ksiar bad ka la long bun shah na baroh ki district kiba la wan shim bynta ha kane ka lympung ïalehkai kaba la neh lai sngi lynter. Nalor ki takma ksiar, ka EKH ka la khur ruh ïa 8 tylli takma rupa lem bad 3 tylli takma rnong bad haba kheiñ lang baroh kane ka kynhun ka la ïoh haduh 25 tylli ki takma.
Ïa ka kyrdan ba-ar la ïoh da ka East Jaiñtia Hills kaba la khur 7 tylli ki takma kiba kynthup ïa 2 tylli takma ksiar, kawei ka takma rupa bad 4 tylli takma rnong. Ka West Jaiñtia Hills ka la wan balai da kaba khur 10 tylli ki takma kiba kynthup ïa kawei ka takma ksiar, 5 tylli takma rupa bad 4 tylli takma rnong.
Ka South West Khasi Hills lem bad ka South West Garo Hills ki dang long ki kynhun kiba khlem pat ïoh takma bad la khmih lynti ban kin sa lah ban pynurlong ha ka sngi kaba khatduh kata ha ka Sngi Palei.
Haba phai sha kawei na ki ‘thei ïalehkai ka East Khasi Hills, ka Tsame M. Marak ka la thaw ïa ka khana-pateng ha kane ka lympung da kaba ka la lah ban pynkheiñ ïa ka rekod ïalehkai ha ka liang kawang sum (javelin throw) jong ki khynnah kynthei kiba hapoh 16 snem karta da kaba ka la lah ban kawang haduh 31.38 meter.
Kane ka ‘thei ïalehkai ka la tam ïa ka rekod kaba mynshwa kaba long 28.64 meter ba la ïoh da u Wankynsai Pyrtuh na West Jaiñtia Hills District ha u snem 2024. Ka jinglah ban ïalehkai bha ka Marak ka la pynlong pat ïa ka ban khur ïa ka takma ksiar ha ka jingïalehkai javelin Under-16.
Halor kane ka jingjop, na ka liang ka Marak ka la ai khublei ïa ka Sports Authority of India (SAI) Training Centre Shillong halor ka jingïoh ban kilanmet ha katei ka shlem ai jinghikai kat haduh ba ka la lah ban kynjoh sha ka thong.
Ïa kane ka lympung ba la pynïaid da ka tnat ïalehkai lem bad ka Meghalaya Athletic Association (MAA), yn pynkut noh ha ka Sngi Palei ha kaba yn ïadon lang u Myntri ka tnat pule puthi ka Sorkar Jylla, u Rakkam A Sangma kum kongsan.
