Shillong, Jymmang 21
Ka kynhun jong ki runar bym lah ban ithuh, ka la ïoh ban kyndang ïa ka kor ATM jong ka State Bank of India (SBI) kaba don ha Mawkriah ha East Khasi Hills bad ban lute ïa ka pisa kaba long palat ïa ka T.28 lak.
Katkum ka khubor na ki pulit la ong ba kane ka jingjia ka la jia ha ka por dang step phyrngab jong ka sngi Balang, kata ha ka por 3 baje eiei bad la ong ba ki don kumba saw ngut ki runar kiba la prong hapoh ka ATM Booth bad ha kaba ki la pyndonkam da ki ‘gas cutter’ ban plied ïa ka mashin.
Katkum ki durkhih ba la ring da kor CCTV ba pyndait ha kane ka ATM, la ïohi ba ki runar ki la trei bad pyndep ïa ka kam lute ha ka rukom kaba biang eh, kaba pyni ruh ba imat ki la dep ban plan bha bad kiba la shemphang ha kane ka kam.
Katkum ki jingtohkit la ngeit ba kine ki runar ki lah ban dei ka bynta jong ka kynhun ki runar kiba treikam nabar ka jylla Meghalaya, ba lah ban dei na Assam, naba ka rukom plied kaba ki la pyndonkam, ka long thik kum ki khubor shah tuh ba la jia bunsien ha Assam.
Shuh shuh ka khubor na ki pulit ka la ong ba la suba jur ïa ka jingdonkti jong ki runar nabar jylla naba ki tiar ki tar kaba ki la pyndonkam, ki ïasyriem thik kum ki tiar ba la pyndonkam ha ka jingjia shah lute ki ATM ha Assam.
Ha kaba ïadei bad kane, la dep ban register ïa ka case ha thanad Mawngap bad ka jingthwet ban kem ïa ki runar ba donkti ha kane ka kam ka la ïaid shakhmat.
