Shillong, Jymmang 21
Ka Rajasthan United FC ka la pynthikna ba ka la soi ïa u rangïalehkai shadien ka Shillong Lajong FC u Kynsailang Khongsit.
U Kynsailang u la mynjur ïa ka kontrak kaba ar snem kynthih bad kane ka klob kaba thymmai, la ong ka Rajasthan United ha ki social media ha ka taïew ba la dep.
Une u rangïalehkai, 24 snem ka rta na Tyrsad u la paw ruh ha ka durkhih ba lyngkot ba la pyllait da kane ka klob ha kaba u la pynpaw ba u sngewkmen ban ïasoh bad ka Rajasthan United bad u la kular ban ïalehkai bha ha madan ïalehkai.
Kumba ka paw u Kynsailang u la ïalehkai haduh 100 sien ha ka I-League na ar tylli ki klob. U la mih madan nyngkong ha ka I-League na ka bynta ka Lajong ha ka aïom ïalehkai 2017-18 bad u la mih madan ruh na ka bynta ka Kenkre ha ka aïom ïalehkai 2021-22 bad 2022-23. Wat la ka Lajong ka dang ïai neh ha ka I-League na ka bynta ka samoi ban wan, pynban u Kynsailang u la leit pynïasoh biang bad ka klob barim jong u.
Hapdeng kata, u la shah pynïasoh sha ka kynhun ïalehkai Indian Super League ka Hyderabad FC hynrei um shym la ïoh jaka satia ha ka kynhun ba la san (senior), pynban u la ïoh ïalehkai tang khyndiat sien na ka bynta ka kynhun ‘reserve’.
U Kynsailang uba ïalehkai man ka por na ka bynta ka Lajong, u la ïalehkai haduh 20 na ki 22 sien jingïalehkai ha ka aïom ïalehkai I-League 2023-24. Un wanrah ïa ka jingshemphang kaba khraw ïa ka Rajasthan United, kaba la pynlong ban don ha ka kyrdan kaba san ha kane ka samoi ba la dep.
