Shillong, Jymmang 21
Ka Hynñiewtrep Youth Council – Central Executive Council (HYC-CEC), ha ka Sngi Balang ka la pynlong ïa ka jingleit khynra ïa ki nongbylla bar-Jylla kiba trei ha ki projek jong ka Sorkar Jylla kiba don ha New Shillong.
Ha kane ka jingleit jong ka seng, la lap ïa ki ar tylli ki jaka trei kiba dei ki projek jong ka Sorkar Jylla kiba ka kam ka dang ïaid shaid-shaid.
Ha ka jingkylli pyrthew jong ki dkhot ka seng, la lap ba ki don kumba 350 haduh 400 tam ki nongtrei bar Jylla ha kine ki jaka trei bad na kine, kumba 200 tam eiei ki bym don ïa ki kot ki sla kiba biang bad ïa kine baroh la phah ba kin mih noh na kitei ki jaka treikam bad bthah ruh ïa ki ba kim dei ban wan trei lada kim don ïa ki kot ki sla kiba biang kum ka ‘Registration Card’ na ka tnad Labour.
Ka seng ha ka kyrwoh ka la ong ba ki don ruh ki nongtrei bar jylla kiba wan ïalam lang ïa la ki kurim ban sah lang ha kitei ki jaka trei bad ïa kitei ki briew, na ka liang ka seng la phah ba kin mih noh na katei ka jaka.
“Ngim lah khlem da pynpaw ïa ka jingsngewlyngngoh ba kumno kine ki 200 tam ki nongbylla ki ïoh ban trei ban ktah hapoh kitei ki projek khlem da pynbiang ïa ki kot ki sla kiba biang. Don napdeng jong ki, kiba pyni tang ïa ka ‘Acknowledgement Slip” ba ki la aplai ïa ka ‘Registration Card’ na ka tnad Labour bad khlem da ïoh ïa ka ‘Registration Card’, ki la sdang ban trei bylla,” ong ka seng.
Ha kajuh ka por, ka la ong ba kane ka long pyrshah ïa ka aiñ ka Sorkar Jylla – ‘Meghalaya Identification, Registration (Safety & Security) of Migrant Workers Act, 2020’ bad ka ‘Meghalaya Identification, Registration (Safety & Security) of Migrant Workers Rules, 2020’.
Ka seng ka la ong ba katkum ka kyndon ba 4 jong ka ‘Meghalaya Identification, Registration (Safety & Security) of Migrant Workers Act, 2020’, baroh ki nongbylla kiba wan nabar Jylla ki dei ban pynrung kyrteng ïalade bad ban da ïoh ïa ka ‘Registration Card’ haba ki wan trei hapoh Meghalaya.
“Lada ki pynkheiñ ïa kane, kin shah daiñ kuna. Kino-kino ki briew kiba ai kam ïa ki nongbylla bar Jylla ki dei ban pyntikna ba kita ki nongbylla bar Jylla kin da pynrung kyrteng ban ïoh ïa ka ‘Registration Card’ bad lada ki pynkheiñ ïa kane, ki lah ban shah daiñ kuna,” la ong ka seng.
Ka seng ka pynrem jur halor ka jingshim sting jong ki tnad treikam ka Sorkar Jylla ki bym shimkhia ban pyntreikam ïa ki kyndon aiñ kiba ka Sorkar ka la shna bad kane ka lah ban buh jingma shi kat dei ïa ka Jaidbynriew rit paid bad ktah ïa ka shongsuk shongsaiñ ha ka Jylla baroh kawei.
“Kumba paw ki dak ki shin, ki lah ruh ban don wat ki nong Bangladesh ki ban rung bad rieh tngen ha kum kine ki jaka trei kiba bun paid bad hadien katto-katne kin sa mih pat ban leh ïa ki kam be-aiñ ym tang ha ka Jylla hynrei ha Ri India baroh kawei,” ong la kyrwoh.
Na ka liang ka Seng, ka la ban jur ba nangne shakhmat kan nang ïai pynjur shuh-shuh ïa ki kam khynra nongbylla bar Jylla ha kylleng ka Ri-Lum Khasi-Jaiñtia.
“Lada ngi lap ïa ki bym don ki kot ki sla kiba biang, ka Seng kan ym shah ïa ki ba kin shong kin sah bad trei ha kum kita ki jaka trei bad yn pynphai ïa ki sha la ki shnong ki thaw kiba ki wan,” pynkut ka kyrwoh.
