Shillong, Jymmang 21
Ka Meghalaya BJP ka la dawa na ka Sorkar Jylla ban pyntreikam pura ïa ka Meghalaya Residents Safety & Security Act (MRSSA) bad pynthymmai ïa ki ‘Task Force’ da kaba kynthup lang ïa ki Rangbah Shnong bad ki Dorbar khnang ban tehlakam ïa ka jingwan buhai shnong be-aiñ jong kiba nabar.
“Ka MRSSA kaba long ka stieh ïada na ka jingwan buhai shnong be-aiñ kaba khlem jingmut, ka dang sah ha ka kot haduh kane ka sngi. Ka BJP ka dawa ba dei ban pyntreikam pura mardor ïa ka MRSSA khnang ba ki nongshong shnong kin ym shah tyllep na ka jingshlei jong ki briew kiba khlem ïoh jingbit kiba wan rung sha ka ri jong ngi na kiwei pat ki ri,” ong ka kyrwoh na u State General Secretary ka BJP-Meghalaya Pradesh, Bah Wankitbok Pohshna.
Haba pynpaw ka jingsngewhun ba ka Sorkar Jylla ka la sdang ban leh eiei pyrshah ïa ki briew kiba wan rung be-aiñ, ka seng ha kawei ka liang ka la pynsngew ba ïa kum kane ka sienjam la dei ban leh naduh mynshuwa, khlem da ap ïa ka jingbthah na ka Sorkar Pdeng.
Halor ka jingpynpaw jong ka Sorkar Jylla ba ka ‘Task Force’ ka don ha man la ki distrik ban peit bad pynithuh ïa ki nongwan buhai shnong be-aiñ kiba wan shong shnong ha ka Jylla, u Bah Pohshna ha kawei ka liang u la ong ba kine ki kynhun treikam kim shym la lah ban leh eiei ha kine ki snem ba la leit – da kaba buh jingmut ïa ka jingnang kiew ha ka jingdon jong ki nong Bangladesh bad Rohingya ha Meghalaya, ha kaba bun ki trai shnong ki lah ban sakhi.
“Ka Meghalaya BJP ka ai jingmut ba ka Sorkar Jylla kan pynthymmai ïa ki ‘Task Force’ bad pynïar ïa ki da kaba kynthup lang ïa ki Rangbah Shnong bad ki Dorbar jong kawei-pa-kawei ka shnong kiba lah ban ïarap ban pynithuh ïa ki briew ki bym dei napoh ka thaiñ – bad ki bor ba dei khmih ki lah ban shimti pat ïa ka jingtohkit nangta shakhmat,” u la ong.
Hashuwa, ka seng ka la pynpaw ka jingsngewnguh ïa ka tnad pohïing ka Sorkar Pdeng hapoh ka jingïalam u Myntri ka tnad pohïing, u Amit Shah halor ka jingai por kaba 30 sngi ïa baroh ki Jylla ban wad, pynithuh, bad ban beh ïa ki briew kiba wan rung be-aiñ na Bangladesh bad Myanmar.
“Ka jingwan rung tuh khlem ka jingpeitngor, kaba la ïarap da ki katto-katne bad ki seng saiñ pyrthei da ka jingthmu ban myntoi ïoh ‘vote’, ka la bteng la slem palat, kaba la wanrah ïa ka jingkylla ha ka jingbun briew ha kiba bun ki bynta jong ka ri kynthup ïa ka Meghalaya. Ka jingktah jong ka jingwan buhai shnong be-aiñ, lah ban ïohi ha ki jaka bapher-bapher jong ka Jylla, kynthup ha nongbah Shillong – kaba pynmih ïa ka jingsngewkhia kaba jur hapdeng ki nongshong shnong,” u la ong. U la ong ruh ba ki nongwan buhai shnong be-aiñ na Bangladesh bad Myanmar ki buh jingeh kaba khraw halor ki jingdon-jingem jong ka Jylla bad ki donkti ruh haba ïadei bad ka jinglong-jingman ka shong suk shong shngaiñ, ha ryngkat ka jingkiew jong ki kam runar kiba rit ba ria ha kiba bun ki jaka ba la pynshong nongrim lyngba kine ki nongwan buhai shnong be-aiñ na ki ri ba marjan.
“Bun na kine ki briew ki rah ruh ïa ka jingmut jingpyrkhat kaba pyrshah India bad kumta ki buh jingma ïa ka jingshngaiñ jong ka ri jong ngi,” u la ong.
Shuh shuh u la bynrap ba ka BJP jong ka Jylla ka dang don hapdeng ka jingpynkhreh ban phah ïa ka kynhun na bynta ban ïamir jingmut bad ki heh ophisar ka tnad pohïing ka Sorkar Pdeng.
“Ka jingthmu ka long ban pyntip sha ki heh Sorkar shaphang ka jinglong-jingman ba shisha ha ka jaka – ha kaba ïadei bad ka jingwan buhai shnong be-aiñ,” la ong u General Secretary.
