Shillong, Jymmang 21
Ki tyllong umbam umdih kiba bun ki la shah ktah jur na ka daw jong ka jingwan tuid jong ki jaboh kiba tuid na ki jaka ba buh bad pynlang dewïong ha ki bynta jong ka Amlarem.
Ha kaba ïadei bad kane, ka Khasi Student’s Union (KSU) War-Jaiñtia Circle ha ka jingïalam u Asst. General Secretary u samla Mechanki Syngkon, u Organising Secretary samla Block Tariang ki la leit ban buh dorkhas ha ophis jong ka SDO Civil Sub Division Amlarem hadien ba ki paidbah ka thaiñ ki la wan pynsngew sha ki nongïalam jong ka seng halor ka jingshah ktah ki tyllong umdih na ka daw ka jingwan tuid ki jaboh kiba mih na ki dewïong kiba lah ieh da ki bun bun snem ha ki jaka ba pyllang ïa ki.
Ka KSU War Jaiñtia Circle, ka la leit ban pynsngew ïa kane ka jingma kaba ap ïa ka koit ka khiah jong ki nongshong shnong ha ka SDO (C) Amlarem ban phah tuklar halor ki jingbuh pathar ïa u dewïong kiba ieh la slem ha kiba bun ki jaka bad ruh kiba la buh ha ki bynta jong ka surok Amlarem – Dawki.
Na ka daw ka jinghap u slap khamtam ha kum kane ka aiom slap, ka um ba tuid na u dewïong ka la ktah ïa kiba bun ki umbam umdih kumjuh ruh ïa ki jingthung jingtep.
Ka KSU ka kyntu ïa ka SDO ban bthah ïa ki trai jaka bad ki trai dewïong ban weng noh bad ban buh ha ki jaka kaba biang, khnang ba kan ym ktah ïa ka koit ka khiah ki nongshong shnong ka thaiñ.
