Shillong, Jymmang 21
Uwei u rangbah u la shah pynngop bad shah sei ei ka pisa palat lak tyngka ha uwei u briew uba la kam ïalade kum u nongtrei jong ka ICICI Bank.
Katkum ka khubor na ki pulit la ong ba une u rangbah uba dei na kawei na ki dong ha nongbah Shillong u la ai ka jingujor ba ha ka 15 tarik mynta u bnai, u la ïohpdiang ïa ka phone call na u number bym ithuh, ha kaba u nong phone u la kam ïalade ba u dei nongtrei jong ka ICICI bank bad bthah ïa une u rangbah ban phah ka aplikeshon na ka bynta ban pynïoh ka credit card lyngba ka ‘WhatsApp’, ïa kaba une u rangbah u la kohnguh. La ong ba kham hadien, une u rangbah u la ïohpdiang ka OTP bad ka byrta (notice) ba ka pisa kaba long haduh T.1.59,648 (ha ka jingshah sei haduh lai sien) ka la shah khate na ka SBI Credit Card jong u lyngba ka Flipkart.
Ha kawei pat ka khubor, uwei u nongshong shnong jong ka dong ha East Jaiñtia Hills u la ai ka jingujor ba ha ka 26 tarik jong u bnai Ïaïong, 2025, ka pisa kaba long T.15,164/- ka la shah khate na ka Flipkart Bank account ka jong u, khlem ka jingtip ka jong u.
Ha kaba ïadei bad kane, na ka liang jong ki pulit ki dang pynlong ïa ka jingtohkit ban lap ïa ki jingshisha bad kumjuh ruh ban lap ïa ki briew kiba donkti ha kane ka kam.
