Jowai, Jymmang 21
U Myntri Rangbah ka Jylla, Conrad K Sangma u la pynbna ba ka Sorkar Jylla ka la pyllait pisa T.20 klur sha ka Jaiñtia Hills Autonomous District Council (JHADC) kaba long na ka bhah jong ka khajna ba la lum na ki marpoh khyndew.
U Conrad u la ïathuh ïa kane ha ka jingïakren bad ki lad pathai khubor hadien ka jingïalang bad ki MDC jong ka liang synshar ka JHADC ha Orchid Inn, Thadlaskeiñ, West Jaiñtia Hills District ha ka 21 tarik u bnai Jymmang.
U Myntri Rangbah u la ïathuh shuh shuh ba hapoh ar ne lai taïew ka Sorkar Jylla kan sa pyllait sa T.19 klur sha ka JHADC.
Ha kane ka jingïakynduh nalor u Conrad K Sangma, la donlang ruh u Symbud Myntri Rangbah ka Jylla Ma Sniawbhalang Dhar, u Myntri Sorkar Ma Comingone Ymbon, u MLA ka Jowai Ma Wailadmiki Shylla, u CEM JHADC Ma Thombor Shiwat.
U Conrad u la ïathuh ba ka mat kaba kongsan ha ka jingïakren bad ki MDC jong ka JHADC ka long shisha ka mat jong ka tulop kaba dang sahteng bad ka jinglong jingman ha ka liang ka pisa tyngka.
U la ong ba ka jingeh ha ka liang ka pisa tyngka ha council ka mih na ka daw ka jingkhang tih dewïong, kaba la ktah ïa ki lad kamai bad kaba la shim por ban pynbeit.
“Mynta ngi la poi ha ka bynta bad ngi la pynbeit ryntih hynrei ka jingktah ha ka liang ka pisa tyngka ka dang don ha ka JHADC bad ha kiwei pat ki District Council jong ka Jylla,” u la ong.
Nalorkata ha kane ka jingïakynduh bad ki MDC, u Conrad u la ïakren ruh halor ki lad ki lynti ban ïatreilang ban kyrshan ym tang ïa ka JHADC hynrei ïa kiwei pat ki District Council kumjuh ban trei ban pynkylla dur ïa ki council la ka long ha ka liang ka synshar khadar bad ka pisa tyngka.
U la ong ba baroh ki mat kiba la ïakren yn sa buddien bad yn don biang ka jingïalang ha kine ki ar lai sngi ban wan ha kaba u Symbud Myntri Rangbah ka Jylla u Ma Sniawbhalang Dhar un sa ïakynduh biang ïa ki dkhot ka council, bud sa ka jingïamir jingmut bad ki heh ka tnat pla tyngka ban wad ïa ki lad ki lynti ban pynjem ïa ki jingeh ka council.
