Mawkyrwat, Jymmang 21
Ka shnong Photeitsim kaba don ha thaiñ khappud marjan bad ka shnong Photkroh ha South West Khasi Hills District sa shisien pat ban pynneh pynsah ïa ki dohum-dohwah ha ka wah Photmula ïa kaba ka shnong ka la ju maham na ka por sha ka por namar ki jingpynïap pathar ïa ki dohum-dohwah, ka la maham biang bad shim ïa ki sienjam ba tyngeh kata ban daiñ kuna haduh T.50 hajar ïa ki briew kiba pynïap dusmon ïa ki dohum ha kane ka wah.
Kum ban shu pynkynmaw ka shnong Photeitsim ka la ïaleh bad pyrshang ban pynneh pynsah ïa ki dohum ha kane ka wah hynrei kaba sngewsih ka long ki ‘riew shim kabu tang shu wan ka tlang ki ju wan ban leh dusmon ïa kane ka wah da kaba ber bih, ai dawai, siat bom bad pynhap jar hapoh kane ka wah tang namar ka jingïohnong shimet jong ki bad kim burom ruh ïa ki adong kaba ka shnong ka la maham.
U Myntri shnong Photeitsim, Bah Angeljune Snaitang haba kren sha ki lad pathai khubor u la ïathuh ba kane ka wah ka don ki kshaid bad ki thwei kiba itynnad kaba lah ban khring ïa ki nongwan jngohkai pyrthei bad lada lah ban pynneh pynsah sa ïa ki dohum-dohwah katno kan pyni ïapmat shuh shuh ïa ki nongwan jngohkai pyrthei.
Kumta ka shong Photeitsim sa shisien pat ka la maham tyngeh bad khang pyrshah ïa kiba ju wan pynjot ïa kane ka wah ba lada lap ïa kino-kino kiba ïaleh pyrshah ka shnong ryngkat ka jingïatreilang bad ki bor district kin sa pynshitom katkum ka aiñ.
