Shillong, Jymmang 22
Ka Sorkar Jylla ka la pynbna ba kan khang noh shipor ïa ka jingïaid jong ki kali na ka surok hapdeng ka Laitlyngkot-Langkyrdem ka ban treikam 6 kynta shiteng ha ka shi sngi bad kan bteng haduh 5 sngi lynter.
U Sub Divisional Officer (C) Pynursla Civil Sub Division u la pynmih ka jingpynbna ba kane ka jingkhang ïaid kali kan sdang naduh ka 26 tarik Jymmang haduh ka 30 tarik Jymmang.
U la pyntip ba ka por ban khang ïa ka jingïaid ki kali ha shilynter jong ka surok Laitlyngkot-Langkyrdem kan long hapdeng ka por 7 baje mynstep haduh 10 baje mynstep bad 12:30 mynsngi haduh ka por 4 baje janmiet.
U la pyntip ba ka jingkhang ïa kane ka surok ka long kaba donkam na ka bynta ban pynthikna ïa ka jingïaid beit ïaid ryntih ka kam shna surok, khamtam eh, na ka daw ka jingdon jong ki bynta ba syier ha shi lynter ka surok kiba donkam ban pynkhuid bad pynbha.
La kyntu jur ïa ki nongleit nongwan ba kin kiar na ka leit ka wan ha ka por miet ha kine ki bynta jong ka surok kum ka jingshim lypa ka jingïada na ka daw jong ka jingap jingma namar ka jinglong ka surok bad ka suiñbneng.
La kyrpad ruh ïa ki nongleit nongwan ba kin ai ka jingïatreilang bad ban khreh biang por lypa ïa la ka jingleit jingwan ha kine ki sngi bad ki por ba la buh bad ruh ba kin bud ryntih ïa kitei ki jingkyntu ba kin kiar na ka ïaid ka ïeng ha ka por miet na ka bynta ka jingmyntoi lang jong uba bun bad ka jingpyndep biang por ïa ka jingshna surok.
