Dimapur, Jymmang:
U Myntri Rangbah ka Nagaland, u Neiphiu Rio, uba dei ruh u Chairman jong ka Nagaland State Disaster Management Authority (NSDMA), ha ka sngi Ba-ar, u la bthah ïa baroh ki tnad sorkar, ba kin bishar bniah ïa ka jingdon jong ki marbam ba donkam ha kylleng ki distrik, shwa ban shah ktah na ka jingwan jong ka aïom slap.
Haba pynïaid ïa ka jingïalang pynkhreh ïa kane ka aïom ha ka ïing ïalang jong u Myntri Rangbah ha Nagaland Civil Secretariat ha Kohima, u Rio u la ong ba lada don kino kino ki jingujor na kano kano ka shnong ne ka sor halor ka jingduna ki marbam ba kongsan ïa kane ka kam hap ban pyntip sha ka bor synshar.
U la bthah ruh ïa ki tnad ba kin buddien ïa ki dukan die dor hok ban pynthikna ba ïa ka hok jong ki nongthied nongpet la ïada.
U la bthah ïa u Chief Secretary ban pynlong ïa ka Video Conference bad baroh ki Deputy Commissioner bad ban pynthymmai ïa ka jinglong jingman jong ki mar ba kongsan bad ka jingpynkhreh ïa ka aïom slap ha kylleng ki distrik.
U Rio u la bthah shuh shuh ïa ka tnad synshar bad tnad pulit ban talasi ïa ki surok man ka por ban pynthikna ïa ka jingïaid beit ïaid ryntih jong ki kali ha ki sor bad kumjuh ruh ha ki surok bah jong ka ri ha ka por Lyiur.
U Myntri ka tnat Roads and Bridges u G Kaito Aye u la kyrpad ïa ka tnad Disaster Management ban mang pisa kyrpang na ka bynta ka jingïarap ba kyrkieh, kaba lah ban pyndonkam da kano kano ka tnad ha kane ka aïom.
U la khot ruh ïa ka NHIDCL bad ka tnad PWD (ki surok bad ki jingkieng) ban ithuh ïa ki jaka ba donkam ban pynbha bad maramot mardor ïa ki surok, ban pynbeit ïa ki buit pynbha bad ban pynthikna ïa ka jingtreikam jong ki.
U la kyrpad shuh shuh ïa ka tnad Mechanical ban pynthymmai ïa ka jinglong jong ki mashin kiba don na ka bynta ka aïom slap.
U Myntri ka PHE u Jacob Zhimomi u la maham ïa ka NHIDCL ban bthah ïa ki kontraktor ba kin bud ïa ki kyndon kiba pyrkhing bha ha ka por ba shna surok na ka bynta ka jinglong slem bad jinglong slem jong ki surok.
Ha ka jingpyni jong u ha ka PowerPoint halor ka ‘jingkheiñ lypa ïa u slap 2025 na ka bynta ka Nagaland’, u heh ophisar ba ïatreilang jong ka NSDMA, u Johnny Ruangmei u la ong ba ka rukom slap ha kylleng ka jylla kan long ka bym ïaryngkat bad ka bym ïahap, ka ban ktah ïa ka aïom thung jingthung.
U Ruangmei u la ong ba ka rukom pynduna ïa ka jingma na ki jingjia basngewsih kaba shimkhia ryngkat bad ka jingpynkhreh, ka jingthmu ba la pynshong nongrim ha ki jingtip bad ka jingïatreilang bad ki paidbah ka lah ban pynduna shibun ïa ki jingma kiba lah ban mih.
